کرائسٹ چرچ میں کھیلے جا رہے کہ فائنل میچ میں میزبان نیوزی لینڈ کو 5 وکٹوں سے شکست دے کر پاکستان نے سہ ملکی ٹی ٹوئنٹی سیریز جیت لی۔
ٹی ٹوئنٹی ورلڈ کپ سے قبل شاہینوں نے اونچی اڑان اڑتے ہوئے نیوزی لینڈ میں کھیلی گئی سہ فریقی ٹی ٹوئنٹی سیریز جیت لی، حیدر علی اور حیدر علی اور محمد نواز کی دھواں دار بیٹنگ کی بدولت پاکستان نے نیوزی لینڈ کی جانب سے دیا گیا 164 رنز کا ہدف آخری اوور کی تیسری گیند پر حاصل کرلیا۔
ہدف کے تعاقب میں پاکستان کو پہلا نقصان 29 کے مجموعی اسکور پر اٹھانا پڑا جب کپتان بابر اعظم 15 رنز بنا کر بریسیول کا شکار بنے، ٹیم کا مجموعی اسکور 64 پر پہنچا تھا کہ شان مسعود 19 رنز بنا کر پویلین لوٹ گئے جب کہ محمد رضوان بھی ٹیم کے مجموعے میں صرف مزید 10 رنز کا اضافہ کرنے کے بعد وکٹ گنوا بیٹھے۔
اس موقع پر حیدر علی اور محمد نواز نے کریز سنبھالی اور دھواں دھار بیٹنگ کرکے پاکستانی ڈریسنگ روم میں بیٹھے کھلاڑیوں اور عوام کے چہروں پر مسکراہٹ واپس لے آئی، دونوں کے درمیان تیز رفتار 56 رنز کی پارٹنر شپ قائم ہوئی، حیدر علی نے صرف 15 گیندوں پر جارحانہ 31 رنز بنا کر میچ کا پانسہ پاکستان کے حق میں پلٹ دیا، حیدر علی نے دو چھکے اور تین چوکے لگائے، ان کے آؤٹ ہونے کے بعد آصف علی میدان میں آئے اور صرف ایک رن بنا کر واپس لوٹ گئے تاہم کریز کے دوسری جانب موجود محمد نواز نے اپنا لاٹھی چارج جاری رکھا۔
محمد نواز نے 22 گیندوں پر تین چھکوں اور دو چوکوں کی 38 رنز کی ناقابل شکست اننگ کھیلی، افتخار احمد نے ان کا بھرپور ساتھ دیا اور وہ 14 گیندوں پر 25 رنز بنا کر ناٹ آؤٹ واپس آئے۔
محمد نواز کو ان کی آل راؤنڈ کارکردگی پر میچ کا بہترین کھلاڑی قرار دیا گیا جب کہ کیوی بولر مائیکل بریسویل نے سیریز کے بہترین کھلاڑی کا اعزاز پایا۔
اس سے قبل پاکستان نے ٹاس جیت کر پہلے نیوزی لینڈ کو بیٹنگ کی دعوت دی، میزبان ٹیم 7 وکٹوں کے نقصان پر 163 رنز بنائے، کپتان کین ولیمسن 59 رنز بنا کر ٹاپ اسکورر رہے، گلین فلپس 29 اور مارک چیمپن 25 رنز بنا کر نمایاں رہے۔
پاکستان کی جانب سے حارث روؤف نے 22 اور نسیم شاہ نے 38 رنز دے کر دو دو کھلاڑیوں کو آؤٹ کیا، شاداب خان اور محمد نواز نے ایک ایک وکٹ حاصل کی۔
میچ میں قومی ٹیم میں ایک تبدیلی کی گئی تھی، محمد حسنین کی جگہ حارث رؤف کو شامل کیا گیا ہے۔
