اسلام آباد : پاکستانی سفارت کاری کیلئے رواں ماہ اپریل انتہائی اہم قرار دیا جارہا ہے، سفارتی ذرائع کا کہنا ہے کہ یہ اقدامات ملک کی سیاسی و معاشی ترقی میں انتہائی اہمیت کے حامل ہیں۔
اس حوالے سے سفارتی ذرائع نے اے آر وائی نیوز کو بتایا کہ رواں ماہ اپریل میں اہم سرکاری دورے، کانفرنسوں اور ملاقاتوں کیلئے شیڈول فل ہوگیا ہے۔
ذرائع کے مطابق آذربائیجان کے وزیر اقتصادیات و سرمایہ کاری میکائیل جباروف کل اسلام آباد پہنچ رہے ہیں، اقتصادی تعاون تنظیم کے سیکرٹری جنرل ڈاکٹر اسد مجید خان بھی کل اسلام آباد پہنچ رہے ہیں۔
اس کے علاوہ ای سی او سیکرٹری جنرل و سابق سیکرٹری خارجہ 10 اپریل تک پاکستان کا سرکاری دورہ کررہے ہیں، سیکرٹری جنرل 12 تا 14 اپریل لاہور میں ای سی او مستقل نمائندوں کی کونسل اجلاس میں شرکت کرینگے۔
سفارتی ذرائع کا کہنا ہے کہ کل سے اسلام آباد میں 2روزہ پاکستان منرلز انویسٹمنٹ فورم کا انعقاد بھی ہورہا ہے، فورم میں متعدد غیرملکی وفود، وزراء بھی شرکت کررہے ہیں۔
امریکی کانگریس کا ایک وفد بھی10سے15اپریل تک پاکستان کا دورہ کرے گا، امریکی کانگریس میں جیک بریگمین اور ٹام سوزی وفد کی قیادت کریں گے۔
اس کے علاوہ امریکہ کا ایک بین الاداراتی وفد بھی10اپریل تک اسلام آباد میں موجود رہے گا، وفد کی قیادت بیورو آف ساؤتھ اینڈ سینٹرل ایشین افیئرز ایرک مائر کررہے ہیں۔
وفد کل شروع ہونے والی پاکستان منرلزانویسٹمنٹ فورم میں شرکت کرے گا، وزیراعظم شہباز شریف اعلیٰ سطح وفد کےہمراہ 10 اپریل کو منسک, بیلاروس کا دورہ کرینگے۔ اپریل میں ہی اوورسیز پاکستانیوں کی کانفرنس کا انعقاد بھی کیا جائے گا۔
سفارتی ذرائع کے مطابق سیکرٹری خارجہ آمنہ بلوچ وسط اپریل کے بعد بنگلہ دیش کا دورہ کریں گی، آمنہ بلوچ 17اپریل کو ڈھاکہ میں پاک بنگلہ دیش سیاسی مشاورتی اجلاس میں شرکت کرینگی۔
رواں ماہ نمائندہ خصوصی برائے افغانستان صادق خان بھی افغانستان کا دورہ کرینگے، صادق خان کی پاک افغان مشترکہ کوارڈنیشن کمیٹی اجلاس میں شرکت پر غور جاری ہے۔
اپریل میں ہی افغان وزیر تجارت نورالدین عزیزی کا بھی دورہ پاکستان متوقع ہے، نائب وزیراعظم اور وزیرخارجہ اسحاق ڈار کا دورہ بنگلہ دیش22 سے24ا پریل تک متوقع ہے۔
سفارتی ذرائع کا مزید کہنا ہے کہ آذربائیجان کے صدرالہام علئیوو بھی 26 سے 27 اپریل کو پاکستان کا دورہ کریں گے، اس کے علاوہ اگلے ماہ مئی میں وزیراعظم شہبازشریف اور آرمی چیف سید عاصم منیر ملائشیاکا دورہ کریں گے۔
