اسلام آباد : وزیراعظم عمران خان کی آمد کے موقع پر سعودی عرب کے دارالحکومت جدہ کی اہم شاہراہوں، چوراہوں کو پاکستان کے جھنڈوں سے سجا دیا گیا۔
تفصیلات کے مطابق وزیراعظم عمران خان 2 روزہ سرکاری دورے پر سعودی عرب روانہ ہوگئے، عمران خان کی آمد پر سعودی عرب کے دارالحکومت جدہ کو پاکستان کے جھنڈوں سے سجا دیا گیا۔
سعودی حکومت کی جانب سے پہلی بار جدہ کی اہم شاہراہوں، چوراہوں پر پاکستانی اور سعودی پرچم لہرا دیئے گئے۔
وزیراعظم عمران خان سعودی فرمانروا سلمان بن عبدالعزیز اور ولی عہد محمد بن سلمان سے الگ الگ ملاقاتیں کریں گے جبکہ سعودی فرمانروا وزیراعظم کے اعزاز میں شاہی محل میں ضیافت بھی دیں گے۔
مزید پڑھیں : وزیراعظم عمران خان پہلے سرکاری دورے پر سعودی عرب روانہ
ترجمان کے مطابق وزیراعظم کے ہمراہ جانے والے وزرا اپنے سعودی ہم منصب سے ملاقاتیں کریں گے جبکہ وزیراعظم او آئی سی کے سیکریٹری جنرل سے بھی ملاقات کریں گے۔
وزیراعظم مدینہ منورہ میں زیارت اور عمرہ کی سعادت بھی حاصل کریں گے۔
سعودی عرب کے دورے کے بعد وزیراعظم بدھ کی شام وفد کے ہمراہ متحدہ عرب امارات پہنچیں گے، جہاں متحدہ عرب امارات کے ولی عہد وزیراعظم کا ایئرپورٹ پراستقبال کریں گے۔
واضح رہے کہ وزیراعظم سعودی عرب کے بادشاہ سلمان بن عبدالعزیز اور ولی عہد محمد بن سلمان کی دعوت پر یہ دورہ کر رہے ہیں۔
