نیویارک: پاکستانی صحافیوں نے نیویارک میں پولیس ہیڈکوارٹر کا دورہ کیا ہے، جس کا اہتمام پاکستانی پولیس افسران کی تنظیم پاکستانی لا انفورسمنٹ سوسائٹی اور نیویارک پولیس کے شعبہ اطلاعات نے کیا۔
تفصیلات کے مطابق نیویارک میں پاکستانی صحافیوں نے پولیس ہیڈکوارٹر کا دورہ کیا، اس موقع پر ڈی سی پی آئی آفس کے پاکستانی نژاد پولیس افسر شاہد مرزا، اسسٹنٹ کمشنر پولیس کارلوس نیوائس اور پالس کے صدر روحیل خالد اور دیگر ممبران موجود تھے۔
صحافیوں نے پولیس ہیڈ کوارٹرز کے حساس آفس سمیت مختلف مقامات کا دورہ کیا، جن میں شعبہ اطلاعات، ہال آف ہیرو، جوائنٹ آپریشن یونٹ اور رئیل ٹائم کرائم سینٹر شامل تھے، میڈیا پرسنز نے خاص طور پر لاکھوں کے شہر پر نظر رکھنے والے کنٹرول روم میں دل چسپی لی جو سب کی توجہ کا مرکز بنا رہا۔
وہاں موجود افسر نے بتایا کہ نیویارک پولیس 62 ہزار کیمروں کی مدد سے نیویارک شہر میں ہونے والے جرائم پر نظر رکھتی ہے، جب کہ مختلف مواقع پر عبادت گاہوں سمیت مختلف پرائیوٹ اداروں کے کیمرے بھی استمال ہوتے ہیں، ان کا کہنا تھا کہ اہم مواقع پر دیگر اداروں کے نمائندے بھی اس سینٹر روم کا حصہ بن جاتے ہیں۔
رئیل ٹائم کرائم سینٹر کے دورے کے موقع پر پاکستانی نژاد پولیس افسر محمد زاید نے بریفنگ دی، اس سے قبل صحافیوں سے گفتگو کرتے ہوئے اسسٹنٹ کمشنر کارلوس نیوائس کا کہنا تھا کہ انھیں نہں معلوم تھا کہ نیویارک میں پاکستانی میڈیا کی اتنی بڑی تعداد ہے۔
