کراچی : روس اور یوکرین کے مابین جاری تنازعے کے بعد ہونے والی جنگ میں پاکستانی طالب علم بہت مشکلوں سے اپنی جان بچاتے ہوئے وطن واپس پہنچ گیا۔
اس حوالے سے ذرائع کے ما کہنا ہے کہ یوکرین میں ہونے والی جنگ سے بچ کر پہلا پاکستانی نوجوان طالب علم استنبول کے راستے وطن واپس پہنچ گیا۔
کراچی کے علاقے گارڈن کا رہائشی جنید حسین چار ماہ قبل میڈیکل کی تعلیم حاصل کرنے کے لئے گیا تھا، جنید حسین نے بتایا کہ میں اللہ تعالی کا لاکھ شکر ادا کرتا ہوں کہ ایسے حالات سے نکال کر مجھے بحفاظت واپس وطن پہنچایا۔
نوجوان نے بتایا کہ بہت سے طالب علم یوکرین میں بے یارو مددگار پڑے ہیں، ہمیں سمجھ نہیں آتی تھی کہ کیسے دن گزر ے گا اور کیسے رات بسر ہوگی؟
جنید حسین کے مطابق میرے علاقے کے سینیٹر خدا بخش بابر کی مہربانی سے میں آج اپنے گھر میں خیریت سے پہنچ گیا ، انہوں نے میرے لئے ٹکٹ کا بندوبست کیا جس کی وجہ سے میں وطن واپس پہنچا۔
پاکستانی طالب علم نے بتایا کہ اس سلسلسے میں یوکرین میں پاکستانی سفارت خانے کا کردار بالکل صفر ہے۔ سفارت خانے نے کہا کہ صرف 3 دن کی رہائش ہم دیں گے اس کے بعد ہماری طرف سے کچھ نہیں ہے۔
