اسلام آباد: اقوام متحدہ کے سیکریٹری جنرل انتونیو گوتریس کا کہنا ہے کہ پاکستان کے دستے امن کے لیے بہترین کام کر رہے ہیں۔
تفصیلات کے مطابق اقوام متحدہ کے سیکریٹری جنرل انتونیو گوتریس نے نسٹ میں تقریب سے خطاب کرتے ہوئے کہا کہ پاکستانی دستوں نے دوسروں کے لیے اپنی جانوں کا نذرانہ پیش کیا، پاکستان کے دستے امن کے لیے بہترین کام کر رہے ہیں۔
انتونیو گوتریس کا کہنا تھا کہ پاکستان کے ایک لاکھ 50 ہزار سے زائدجوانوں نے امن مشنز میں کام کیا، پاکستانی افسران امن مشن میں فرسٹ کمانڈر کے طور پر کام کر رہے ہیں۔
اقوام متحدہ کے سیکریٹری جنرل نے کہا کہ تنازعات کے حل کے لیے اقدامات میں مشکلات درپیش ہیں، نئے چیلنجز امن کے تمام شراکت داروں کے لیے اہم ہیں۔
انہوں نے کہا کہ امن مشنز میں پاکستانی افواج کے 157جوانوں نے شہادت پائی، پاکستانی افواج ، پولیس اور سویلینز کا عزم امن مشن کے لیے شاندار ہے۔
اس موقع پر اقوام متحدہ کے سیکریٹری جنرل انتونیو گوتریس نے پاکستانی امن مشنز سے متعلق تصویری نمائش کا افتتاح بھی کیا۔
