آئی سی سی ایلیٹ پینل میں موجود واحد پاکستانی امپائر حسن رضا آج ورلڈ کپ میں انگلینڈ اور نیدر لینڈ میچ میں اہم اعزاز پا لیں گے۔
بھارت میں جاری ورلڈ کپ کے آئی سی سی ایلیٹ پینل میں موجود واحد پاکستانی امپائر احسن رضا آج انگلینڈ اور نیدر لینڈ کے میچ سپر وائز کریں گے. یہ بطور امپائر ان کا 50 واں انٹرنیشنل میچ ہوگا اور وہ یہ سنگ میل عبور کرنے والے چوتھے پاکستانی امپائر بن جائیں گے۔
اس سے قبل علیم ڈار، اسد رؤف اور خضر حیات 50 ون ڈے انٹرنیشنل میچز میں امپائرنگ کر چکے ہیں۔
احسن رضا نے اس سنگ میل کو اپنی اہلیہ کے نام کرنے کا اعلان کرتے ہوئے کہا ہے کہ ان کی اہلیہ نے ہمیشہ اچھے اور بُرے لمحات میں بھرپور ساتھ دیتے ہوئے آگے بڑھنے کا حوصلہ دیا۔
واضح رہے کہ رواں برس مارچ میں علیم ڈار کی جگہ انٹرنیشنل پینل سے ترقی دے کر آئی سی سی نے احسن رضا کو ایلیٹ پینل میں شامل کیا تھا۔ احسن رضا کو سب سے زیادہ 74 ٹی ٹوئنٹی انٹرنیشنل میچ سپروائزر کرنے کا اعزاز بھی حاصل ہے۔
رواں سال انہوں نے آسٹریلیا اور انگلینڈ کی ایشیز سیریز میں پہلی بار امپائرنگ کی تھی۔ وہ اب تک 9 ٹیسٹ میچز بھی سپر وائز کرچکے ہیں۔
