ماسکو : روس میں پاکستانی سفیر خالد جمالی نے بھارت کو خبردار کرتے ہوئے کہا کہ حملہ کیا تو ایٹمی ہتھیاروں سمیت پوری قوت سے جواب دیا جائے گا۔
تفصیلات کے مطابق روس میں پاکستانی سفیر خالد جمالی نے روسی ٹی وی چینل آرٹی کو انٹرویو میں کہا اگر بھارت نے حملہ کیا تو روایتی اور ایٹمی ہتھیاروں سمیت پوری قوت سے جواب دیا جائے گا۔
خالد جمالی کا کہنا تھا کہ پاکستان کے پاس انٹیلی جنس شواہد موجود ہیں، بھارت حملے کی منصوبہ بندی کررہا ہے، خطرہ حقیقی نوعیت کا ہے۔ کسی بھی حرکت کا منہ توڑجواب دیا جائے گا۔
انھوں نے کہا کہ بھارت اس سے قبل بھی متعدد فالس فلیگ آپریشنز کر کے الزام پاکستان کے سر تھوپ چکا ہے، پانی کے مسئلے پر کسی بھی جارحیت کا جواب جنگ سے ہوگا، بھارت کی جانب سے حملے کی صورت میں پاکستان اپنی سرحدوں کے دفاع میں کسی بھی حد تک جائے گا۔
پاکستانی سفیر کا کہنا تھا کہ ہم بھارتی جنگی پروپیگنڈے کو مسترد کرتے ہیں، بھارت کی جانب سے لگائے گئے الزامات کا حقیقت سے دور دور تک کوئی تعلق نہیں۔
انھوں نے مزید کہا کہ ہمیں اپنی سرحدوں کا دفاع کرنے کا پورا حق ہے اور عالمی برادری سے مطالبہ کرتے ہیں کہ پہلگام حملے کی غیر جانبدار تحقیقات کی جائیں۔
