اسلام آباد : پاکستان کا بجٹ خسارہ جی ڈی پی کا 7.7 فیصد تک پہنچ گیا، اخراجات اور آمدن میں 6521 ارب روپے کا فرق رہا۔
تفصیلات کے مطابق وزارت خزانہ کی جانب سے کہا گیا ہے کہ سال 2022 – 23 میں پاکستان کا بجٹ خسارہ جی ڈی پی کا7.7فیصد تک پہنچ گیا ہے۔
وزارت خزانہ کا کہنا ہے کہ جولائی سے جون 2023 تک کل آمدن 9633 ارب روپے رہی جبکہ گزشتہ سال16 ہزار 154 ارب روپے کے اخراجات کیے گئے اور اخراجات اور آمدن میں 6521 ارب روپے کا فرق رہا۔
گزشتہ سال کل ٹیکس آمدن 7818 ارب روپے رہی ، وفاق نے 7169 ارب، صوبوں نے 649 ارب روپے کا ٹیکس اکٹھا کیا جبکہ گزشتہ سال نان ٹیکس آمدن 1814 ارب روپے رہی۔
گزشتہ سال14 ہزار 583 ارب روپے کے جاری اخراجات کیے گئے جبکہ اسی عرصے میں سود کی ادائیگیوں پر 5831 ارب روپے اور دفاع پر 1585 ارب روپے خرچ کیے گئے۔
گزشتہ سال پیٹرولیم لیوی کی مد میں عوام سے 579 ارب روپے وصول کیے گئے اور اس دوران صوبوں کو 4223 ارب روپے منتقل کیے گئے۔
