آئی سی سی چیمپئنز ٹرافی میں بھارت کے خلاف میچ سے قبل پاکستان کی ممکنہ پلیئنگ الیون سامنے آگئی۔
دبئی کے انٹرنیشنل کرکٹ اسٹیڈیم میں کل روایتی حریف پاکستان اور بھارت کی ٹیمیں مدمقابل آئیں گی، میچ پاکستانی وقت کے مطابق دوپہر 2 بجے شروع ہوگا۔
پاکستان کو کراچی کے افتتاحی میچ میں نیوزی لینڈ کے خلاف 60 رنز سے شکست ہوئی تھی جبکہ بھارت نے پہلے میچ میں بنگلادیش کے خلاف 6 وکٹوں سے کامیابی حاصل کی تھی۔
پاکستان کے اوپنر بیٹر فخر زمان بھی چیمپئنز ٹرافی سے انجری کے باعث باہر ہوگئے جس کے بعد پاکستان نے امام الحق کو اسکواڈ میں شامل کیا ہے۔
بھارت کے خلاف اہم میچ سے قبل امکان ہے کہ پاکستان پلیئنگ الیون میں دو تبدیلیاں کرے گا، جس میں امام الحق اور مڈل آرڈر بیٹر کامران غلام کو شامل کیا جائے گا۔
امکان ہے کہ بابر اعظم اور امام الحق اننگز کا آغاز کریں گے، سعود شکیل تیسرے نمبر پر آئیں گے، مڈل آرڈر بلے باز طیب طاہر کو باہر کیے جانے کی توقع ہے ان کی جگہ کامران غلام پلیئنگ الیون میں شامل ہوسکتے ہیں۔
عثمان خان کی فائنل الیون میں شمولیت کا کوئی امکان نہیں، وہ آؤٹ آف فارم ہیں اور ابھی انہیں ون ڈے میں ڈیبیو کرنا ہے۔
پاکستان بولنگ اٹیک برقرار رکھ سکتا ہے جس میں شاہین آفریدی، نسیم شاہ اور حارث رؤف شامل ہیں جبکہ واحد اسپنر ابرار احمد شامل ہوں گے۔
بھارت کے خلاف پاکستان کی ممکنہ پلیئنگ الیون
پاکستان کی ممکنہ پلیئنگ الیون میں امام الحق، بابر اعظم، سعود شکیل، محمد رضوان ، کامران غلام، سلمان علی آغا، خوشدل شاہ، شاہین شاہ آفریدی، نسیم شاہ، حارث رؤف، ابرار احمد شامل ہیں۔
