کراچی : خلائی تحقیق میں سپارکو نے بڑی کامیابی حاصل کرلی ، پاکستان کا پہلا خود مختار قمری روور روانگی کے لیے تیار ہے۔
تفصیلات کے مطابق سپارکو کے انجینئرز کا کارنامہ سامنے آیا، پاکستان کا مقامی طور پر تیار کردہ قمری روور خلائی تحقیق میں نیا سنگ میل ثابت ہوگا۔
سپارکو کا قمری روور چاند کی زمین پر اترنے کو تیار ہے، یہ روور چاند کے جنوبی قطب پر سائنسی تحقیق کرے گا۔
چاند کی سطح کی مٹی کی جانچ اور وسائل کی تلاش کے لیے تیار روور جدید سائنسی آلات سے لیس ہوگا۔
پاکستانی سائنسدان زمین سے اس روور کو کنٹرول کریں گے،35 کلوگرام وزنی روور چاند کی سطح پر جدید نقشہ سازی اور تحقیق کرے گا۔
پاکستان کے خلائی مشن کے تحت یہ روور چاند پر نئی ٹیکنالوجیز کی جانچ کے لیے روانہ ہوگا اور چاند پر مستقبل کے مشنز اور انسانی موجودگی کے امکانات کا تجزیہ کرے گا۔
یہ روور چین کے خلائی مشن "چینگ 8” میں شمولیت کے بعد عالمی خلائی تحقیق کا حصہ بنے گا اور سال 2028 میں چین کے "چینگ 8” مشن کے ذریعے چاند پر جائے گا ، جہاں چاند پر تحقیق اور وسائل کے تجزیے میں کلیدی کردار ادا کرے گا۔
