پاکستانی پاسپورٹ رینکنگ میں بہتری کے بعد شہری دنیا بھر میں کتنے ممالک میں ویزہ فری یا ویزہ آن ارائیول کی سہولت حاصل کرسکیں گے۔
تفصیلات مطابق ہینلے پاسپورٹ انڈیکس کی جانب سے سال 2025 کی رینکنگ جاری کردی ، جس میں پاکستانی پاسپورٹ کی عالمی درجہ بندی میں نمایاں بہتری دیکھنے میں آئی ہے۔
پاکستانی پاسپورٹ بتدریج ترقی کے بعد ٹاپ 100 پاسپورٹس میں شامل ہوگیا،جو 2021 میں 113ویں نمبر پر تھا، یہ ایک مثبت پیش رفت ہے جو عالمی سطح پر پاکستان کی سفارتی سرگرمیوں اور عالمی تعلقات میں بہتری کی عکاس ہے۔
رینکنگ میں بہتری کے بعد پاکستانی پاسپورٹ پر شہری 32 ممالک میں ویزہ فری سفری سہولت بھی حاصل کر سکیں گے۔
یاد رہے حال ہی میں متحدہ عرب امارات اور پاکستان کے درمیان ایک معاہدہ طے پایا، جس کے مطابق سفارتی اور سرکاری پاسپورٹ رکھنے والوں کو ویزا کی شرائط سے مستثنیٰ قرار دیتا ہے۔
مزید پڑھیں : پاکستان اور یو اے ای میں ویزا چھوٹ سے متعلق اہم معاہدہ طے
اس سے قبل یہ رپورٹس سامنے آئی تھیں کہ پاکستانی شہریوں کو قطر میں ویزا فری انٹری حاصل کرنے کے لیے درج ذیل شرائط کو پورا کرنا ہوگا۔
مسافر کا پاسپورٹ کم از کم 6 ماہ کے لیے کارآمد ہونا چاہیے، مسافر کے پاس واپسی کا تصدیق شدہ ٹکٹ ہونا ضروری ہے۔
مسافر کے پاس ایک درست ڈیبٹ یا کریڈٹ کارڈ ہونا ضروری ہے، ویزا 30 دنوں کے لیے مفت دیا جائے گا اور اس میں توسیع نہیں کی جا سکتی۔
مسافروں کو ہوٹل کی تصدیق شدہ بکنگ فراہم کرنی چاہیے اور پاکستان سے براہ راست آنے والے مسافروں کے پاس پولیو سے بچاؤ کے قطرے پلانے کا سرٹیفکیٹ ہونا چاہیے۔
