کراچی: آسٹریلین ہائی کمشنر مس مارگریٹ ایڈمسن کا کہنا ہے کہ پاکستان اور آسٹریلیا کے درمیان دیرینہ تعلقات ہیں، عالمی امن کے لیے پاکستان کی خدمات قابل فخر ہیں۔
تفصیلات کے مطابق کراچی کونسل آن فارن ریلیشنز کے تحت بریک فاسٹ تقریب کے دوران خطاب کرتے ہوئے مس مارگیٹ ایڈمسن کا کہنا تھا کہ پاکستان میں پی ایس ایل زبردست کامیاب ایونٹ بن گیا ہے، امید ہے نا صرف آسٹریلیا بلکہ دیگر ممالک کی کرکٹ ٹیمیں بھی جلد پاکستان کا دورہ کریں گی۔
آسٹریلین ہائی کمشنر نے کہا کہ ہمارے تعلقات قیام پاکستان کے فورا بعد سے ہی قائم ہو گئے تھے، اسٹاف کالج کوئٹہ سے ہمارے تعلقات قیام پاکستان سے پہلے 1910 سے ہیں، ایک پاکستانی نژاد خاتون بھی آسٹریلین پارلیمنٹ کی رکن ہیں۔
ان کا کہنا تھا کہ ہم کاروبار، تعلیم، صحت، زراعت، ڈیری، پانی کے استعمال میں کفایت شعاری، دفاع، انسداد دہشت گردی میں پاکستان کے ساتھ تعاون کرتے رہیں گے، پاکستانی کھلاڑی نے آسٹریلین کرکٹ ٹیم کو دوبارہ ٹاپ پر لانے میں انتہائی اہم کردار ادا کیا ہے۔
مس فارن مارگیٹ ایڈمسن نے کہا کہ پاکستان سپر لیگ بہت زبردست اور کامیاب ایونٹ بن گیا ہے جس میں عالمی کھلاڑی بھی شامل تھے، پی ایس ایل عالمی کرکٹ کو پاکستان واپس لانے میں اہم کردار ادا کرے گی، ویسٹ انڈیز کے دورہ پاکستان سے بھی دنیا کو پاکستان کے بارے میں مثبت پیغام ملا ہے۔
ان کا مزید کہنا تھا کہ امید ہے اب نا صرف آسٹریلیا بلکہ دیگر ممالک کی کرکٹ ٹیمیں بھی جلد پاکستان کا دورہ کریں گی۔
اس موقع پر کراچی کونسل آن فارن ریلیشنز کے چیئرمین اکرام سہگل نے کہا کہ پاکستان میں امن و امان کی صورت حال بہت بہتر ہوئی ہے، بھارت واحد ملک ہے جو افغانستان سمیت پورے خطے میں امن نہیں چاہتا، پاکستان اور آسٹریلیا کے درمیان تعلقات کو مزید وسعت دینے ضرورت ہے۔
