مقبوضہ مغربی کنارے کے شہر جنین میں اسرائیل کے وحشیانہ آپریشن میں 10 فلسطینیوں کی شہادت پر پاکستان کا ردعمل آگیا۔
ترجمان دفترخارجہ نے کہا ہے کہ پاکستان مغربی کنارے کے مقبوضہ فلسطینی علاقے جنین میں گزشتہ روز سے اسرائیلی قابض فوج کی جانب سے کیے گئے چھاپوں اور فضائی حملوں کی شدید مذمت کرتا ہے۔
ترجمان نے بیان میں کہا کہ اسرائیلی حملوں میں 10 فلسطینی شہید اور 50 کے قریب زخمی ہوئے قابض طاقت کی طرف سے فلسطین کے عوام کے خلاف تشدد کی یہ تازہ ترین قسط فوری طور پر ختم ہونی چاہیے عالمی برادری اسرائیلی قابض افواج کے ظالمانہ اور غیر قانونی اقدامات رکوائے۔
پاکستان نے مطالبہ کیا کہ بین الاقوامی برادری فلسطینی عوام کے انسانی حقوق کے تحفظ کو یقینی بنانے کے لیے اپنی ذمہ داری ادا کرے۔
ترجمان کا کہنا تھا کہ پاکستان فلسطینی عوام کے حق خودارادیت سمیت ان کے حقوق اور آزادیوں کے مکمل حصول کے لیے ان کی جائز جدوجہد کے لیے اپنی مضبوط اور غیر متزلزل حمایت کا اعادہ کرتا ہے۔
