لاہور: سری لنکا میں ہونے والے بم دھماکوں کے بعد پاکستان کی انڈر 19 کرکٹ ٹیم کا دورہ سری لنکا منسوخ ہوگیا۔
تفصیلات کے مطابق پاکستان کی انڈر19کرکٹ ٹیم کا دورہ سری لنکا منسوخ ہوگیا، سری لنکا کرکٹ نے فیصلہ سیکیورٹی صورت حال کے پیش نظرکیا۔
ترجمان پی سی بی نے گزشتہ ہفتے انڈر19 کرکٹ ٹیم کے دورہ سری لنکا کے حوالے سے کہا تھا کہ یہ دورہ میزبان کرکٹ بورڈ اور حکومت کی جانب سے دی جانے والی سیکیورٹی کلیئرنس سے مشروط ہوگا۔
ترجمان کا مزید کہنا تھا کہ دھماکوں کے بعد صورت حال کا جائزہ لیا جا رہا ہے، تاہم سیکیورٹی کی مکمل یقین دہانی کے بعد ہی قومی انڈر 19 ٹیم کو سری لنکا بھیجنے کا فیصلہ کیا جائے گا۔
یاد رہے کہ پاکستان انڈر 19 ٹیم نے 30 اپریل کو سری لنکا روانہ ہونا تھا جہاں ٹیم نے 2 چار روزہ جبکہ 3 ایک روزہ میچز کھلینے تھے۔
پاکستان نے سری لنکا کے خلاف 3 مئی سے 6 مئی تک گال میں پہلا روزہ میچ جبکہ 9 سے 12 مئی تک ہمبنٹوٹا میں دوسرا 4 روزہ میچ کھیلنا تھا۔
میزبان ٹیم کے خلاف تین میچوں پر مشتمل ون ڈے سیریز کا پہلا میچ 15 مئی، دوسرا 17 مئی جبکہ تیسرا 20 مئی کو گال میں کھیلا جانا تھا۔
