وزیراعظم پاکستان شہباز شریف نے کہا ہے کہ فلسطینی ریاست کا قیام عمل میں لایا جائے جس کا دارالحکومت القدس ہو۔
شنگھائی تعاون تنظیم کے سربراہی اجلاس اور ایس ای او پلس سمٹ سے خطاب کرتے ہوئے وزیراعظم نے فلسطین کی صورتحال سے متعلق دو ٹوک موقف اپنایا، انھوں نے کہا کہ دیرینہ تنازعات کا حل اقوام متحدہ کی قراردادوں کے مطابق ہونا چاہیے۔
انھوں نے کہا کہ پاکستان 1967 سے پہلے کی سرحدوں کی طرز پر دوریاستی حل کا حامی ہے، اسرائیل کی جانب سے 20 لاکھ فلسطینیوں کو بےگھر کیا گیا۔
وزیراعظم شہبازشریف نے غزہ کا مقدمہ بھرپور طریقے سے لڑا، انھوں نے کہا کہ اسرائیل غزہ میں ظلم کے پہاڑ توڑ رہا ہے، جنگی جرائم کا ارتکاب کررہا ہے۔
شہبازشریف نے شنگھائی تعاون تنظیم کے اجلاس میں بیان دیتے ہوئے کہا کہ عالمی برادری غزہ میں فوری جنگ بندی کی کوششیں تیز کرے، عالمی برادری غزہ میں انسانی امداد کی رسائی کیلئے کوششیں تیزکرے۔
انھوں نے اسرائیلی کو جوابدہ بنانے اور انصاف کے کٹہرے میں کھڑا کرنے پر زور دیتے ہوئے کہا کہ اسرائیل فلسطینیوں کی نسل کشی میں ملوث ہے، عالمی عدالتی انصاف بہیمانہ کارروائیوں کو نسل کشی قراردے چکی۔
وزیراعظم پاکستان نے کہا کہ فلسطین میں 37ہزار کےقریب معصوم لوگوں کو شہید کیا جاچکا ہے، فلسطین کے شہدا میں زیادہ تعداد خواتین اور بچوں کی ہے۔
