قاہرہ: فلسطینی عمرہ زائرین کے لیے مصر کی ’ایجپٹ ایئر‘ نے کنگ عبدالعزیز ایئر پورٹ تک ایک ’فضائی پل‘ قائم کر دیا ہے۔
تفصیلات کے مطابق ایجپٹ ایئر نے 5 ہزار فلسطینیوں کو عمرہ کی ادائیگی کے لیے لے جانے کے لیے فلسطینی ایئر لائنز کے تعاون سے جدہ کے کنگ عبدالعزیر انٹرنیشنل ایئرپورٹ تک فضائی پل بنا دیا ہے۔
مصر کی سول ایوی ایشن کی وزارت نے فیصلہ کیا تھا کہ فلسطینی بھائیوں کو حج اور عمرے کی ادائیگی کے لیے حرمین شریفین کے سفر کی سہولت فراہم کی جائے گی۔
عرب نیوز کے مطابق
مصری ایئرلائن کے بورڈ کے چیئرمین یحییٰ ذکریا نے بتایا کہ نومبر 15 سے 20 فروری 2023 تک کے سیزن کے لیے 14 خصوصی پروازیں شیڈول کی گئی ہیں۔
ایئر لائن کے بورڈ کے چیئرمین احب التہتاوی کے مطابق ان پروازوں کے لیے نیا بوئنگ طیارہ B787-9 پہلی مرتبہ استعمال کیا جائے گا جو کہ مہینے میں چار پروازیں کرے گی، اس طیارے میں 309 مسافروں کو لے جانے کی گنجائش ہے۔
فلسطینی ایئر لائن کے جنرل منیجر جمال المشہروی نے عمرہ زائرین کو سہولت پہنچانے کے لیے مدد فراہم کرنے ایجپٹ ایئر کا شکریہ ادا کیا۔ یاد رہے کہ جولائی میں ایجپٹ ایئر نے سعودی عرب سے فلسطینی، مصری اور مالی کے 10 ہزار حج زائرین کو واپس لانے کے لیے بھی ایک فضائی پل قائم کیا تھا جس کے لیے 144 پروازیں چلائی گئی تھیں۔
