اسلام آباد : پاکستان تحریک انصاف کے رہنما اور سینیئر ماہر قانون حامد خان ایڈووکیٹ نے پاناما کیس کی مزید پیروی سے معذرت کرلی، انہوں نے اپنے فیصلے سے عمران خان کو آگاہ کردیا ہے، پی ٹی آئی نے اعتزاز احسن اور بابر اعوان سے رابطہ کرلیا ہے۔
تفصیلات کے مطابق پاناما لیکس کیس میں تحریک انصاف کو ایک اور جھٹکا لگ گیا، پاناما کیس میں ثبوتوں کی عدم دستیابی اور پی ٹی آئی رہنماؤں کی شدید تنقید کے بعد حامد خان میڈیا مہم پرناراض ہوگئے۔
انہوں نے پاناما کیس سے علیحدگی اختیار کرنے کا فیصلہ کرنے کے بعد عمران خان کو فون کرکے اپنے فیصلے سے کردیا، انہوں نے عمران خان کو بتادیا کہ میڈیا پر جاری مہم کے باعث ان کیلئے سپریم کورٹ کی معاونت ممکن نہیں رہی۔
ذرائع کے مطابق عمران خان نے حامد خان کی خدمات کو سراہا اور اس خواہش کا اظہار کیا کہ حامد خان قانونی ٹیم کی معاونت جاری رکھیں، عمران خان کا کہنا تھا کہ حامد خان کی پیشہ وارانہ صلاحیتوں اور تحریک انصاف سے ان کی کمٹمنٹ کسی قسم کے شک و شبے سے بالا تر ہیں۔
حامد خان کا کہنا تھا کہ خدمات کے اعتراف پر چیئرمین صاحب کا مشکور ہوں مگر مقدمے سے الگ ہونے کی اجازت دی جائے۔
بعد ازاں اپنے فیصلے کے حوالے سے حامد خان ایڈووکیٹ نے میڈیا کو بتایا کہ پاناما کیس کی گزشتہ سماعت کے بعد دو محاذوں پر لڑنا پڑ رہا تھا ، میں قانون کی جنگ تو لڑسکتا ہوں میڈیا کی جنگ نہیں لڑ سکتا اسی لیے قیادت سے کیس لڑنے سے معذرت کی ہے۔ میرے خیال میں نعیم بخاری کو کیس کا پتا ہے اس لیے انہیں ہی کیس لڑنا چاہیئے۔
ذرائع کے مطابق حامد خان کی جانب سے کیس کی پیروی سے معذرت کے بعد پی ٹی آئی نے سینیٹر اعتزازاحسن اور بابر اعوان سے رابطہ کرلیا ہے۔
اعتزاز احسن نے پی ٹی آئی کو پاناما کیس کے حوالے سے اہم ترین تجاویز بھی دی ہیں۔ حامد خان کی معذرت کے بعد پی ٹی آئی کا کیس کون پیش کرے گا اس بات کا حتمی فیصلہ اتوار کے روز عمران خان کی لندن سے واپسی کے بعد کیا جائے گا۔
