اسلام آباد: پاناما لیکس سے متعلق کیس کی سماعت آج سپریم کورٹ میں چیف جسٹس آف پاکستان کی سربراہی میں لارجر بینچ کرے گا۔
تفصیلات کے مطابق پاناما لیکس کے حوالے سے دائر درخواستوں کی سماعت چیف جسٹس انورظہیر جمالی کی سربراہی میں آج سپریم کورٹ کا پانچ رکنی لارجر بینچ کرے گا۔
سپریم کورٹ کے لارجر بینچ میں جسٹس آصف سعیدکھوسہ،جسٹس امیرہانی مسلم،جسٹس عظمت سعیداورجسٹس اعجازالحسن شامل ہیں۔
خیال رہے کہ گزشتہ روزپاکستان تحریک انصاف کے چیئرمین عمران خان نے کل صبح وزیراعظم کی نااہلی کیس پر سپریم کورٹ میں ہونے والی سماعت میں پیش ہونے کا فیصلہ موخر کردیاتھا۔
مزید پڑھیں:پانامالیکس سماعت: سپریم کورٹ کا لارجر بینچ تشکیل
سپریم کورٹ میں آج سماعت کے موقع پر عوامی مسلم لیگ کے سربراہ شیخ رشید اور امیر جماعت اسلامی سراج الحق سمیت وفاقی وزراء کی عدالت میں پیشی کا امکان ہے۔
یاد رہے کہ 20اکتوبرکو ان درخواستوں پر سماعت کے بعد سپریم کورٹ نے وزیراعظم نوازشریف،ان کی بیٹی مریم نواز،داماد ریٹائرڈ کیپٹن صفدر،حسین اور حسن نواز سمیت تمام فریقین کو نوٹس جاری کیے تھے اور سماعت ملتوی کردی تھی۔
تحریک انصاف کےسربراہ عمران خان، امیر جماعت اسلامی سراج الحق اور عوامی مسلم لیگ کے سربراہ شیخ رشید کی جانب سے پاناما لیکس کے حوالے سے درخواستیں دائر کی تھیں۔
واضح رہے کہ 28اکتوبر کوسپریم کورٹ نے پانامالیکس کیس کی سماعت کے لیے چیف جسٹس انور ظہیر جمالی کے سربراہی میں 5رکنی لارجر بینچ تشکیل دیاتھا۔
