پنجگور : مسلح افراد کے ڈیم پر کام کرنیوالے اہلکاروں پر حملے کے نتیجے میں 5 افراد جاں بحق ہوگئے جبکہ کمپنی کی مشینری کو بھی آگ لگادی۔
تفصیلات کے مطابق پنجگور کے علاقے پروموم میں رات گئے ڈیم پر کام کرنیوالے اہلکاروں پر مسلح افراد نے حملہ کردیا، فائرنگ کے نتیجے میں 5 افراد جاں بحق اور 2 زخمی ہوگئے۔
ترجمان بلوچستان حکومت کا کہنا ہے کہ ڈیم کی دیکھ بھال پر مامور افراد پر فائرنگ کی گئی، لاشوں کو مقامی اسپتال منتقل کردیا گیا ہے، جہاں دونوں زخمیوں کی حالت خطرے سے باہر ہے۔
ترجمان صوبائی حکومت نے بتایا کہ جاں بحق افراد تعمیراتی کمپنی کی سیکیورٹی پر مامور تھے، مسلح افراد نے کمپنی کی مشینری کو بھی آگ لگادی تاہم ضلعی انتظامیہ کےافسران موقع پرموجود ہیں اور تحقیقات جاری ہے۔
وزیراعلٰی بلوچستان سرفراز بگٹی نے پروم میں فائرنگ کے واقعےکی مذمت کرتے ہوئے کہا کہ دہشت گردی کاواقعہ قابل مذمت اورناقابل معافی ہے، دہشت گرد ترقی اورامن کےمخالف ملک دشمن عناصر کے پیروکار ہیں۔
سرفراز بگٹی کا کہنا تھا کہ بلوچستان میں امن و ترقی دشمن کی آنکھ میں کھٹک رہی ہے، دہشت گردوں کومذموم مقاصد میں کبھی کامیابی نہیں مل سکتی۔
انھوں نے مزید کہا کہ دہشت گرد بزدل ہیں رات کی تاریکی میں معصوم افراد کو نشانہ بنایا، دہشت گردوں کونہیں چھوڑیں گے، ناحق خون کا حساب دینا ہوگا، ملوث دہشت گردوں کو منطقی انجام تک پہنچایا جائے گا۔
صدر مملکت آصف علی زرداری نے پنجگورمیں دہشت گردحملےمیں قیمتی جانی نقصان پراظہارافسوس کرتے ہوئے واقعےمیں جاں بحق افرادکےلواحقین کےساتھ اظہارتعزیت کیا۔
آصف زرداری کا کہنا تھا کہ دہشت گردملکی ترقی اورصوبےکی خوشحالی کےدشمن ہیں ، دہشت گردبلوچستان کوترقی کرتانہیں دیکھنا چاہتے۔
