مصر میں میاں بیوی آپس میں جھگڑنے کے بعد غصے میں کمسن جڑواں بچوں کو بھوکا پیاسا اکیلا گھر میں بند کرکے چلے گئے۔
غیرملکی نیوز ایجنسی کے مطابق مصر کے صوبے الدقہلیہ میں میاں بیوی میں کسی بات پر جھگڑا ہوا جس کے بعد وہ اپنے جڑواں بچوں کو گھر میں بند کرکے چلے گئے۔
بچے 2 روز تک فلیٹ میں بھوکے پیاسے بند رہے، بھوک پیاس ناقابل برداشت ہونے پر معصوم بچوں نے بلکنا شروع کردیا۔
بچوں کی چیخ وپکار سن کر پڑوسیوں نے فلیٹ میں جانے کی کوشش کی لیکن وہاں تالا لگا ہوا تھا جس پر انہوں نے سیکیورٹی اداروں کو اطلاع دی۔
سیکیورٹی حکام نے وہاں پہنچ کر فلیٹ کا دروازہ توڑا تو انہیں اندر دو بچے بے ہوش پڑے ملے جنہیں فوری طور پر اسپتال پہنچایا گیا بچوں کی عمر دو سال بتائی جاتی ہے۔
سیکیورٹی حکام کے مطابق بچے جڑواں ہیں اور ان کا باپ مزدوری کرتا ہے۔
ان کی تحقیقاتی رپورٹ کے مطابق بچوں کے باپ نے اپنی بیوی سے جھگڑا کیا جس کے بعد وہ دونوں غصے میں فلیٹ کو تالا ڈال کر نکل گئے۔
حکام نے غفلت برتنے اور بچوں کی زندگی خطرے میں ڈالنے کے الزام میں بچوں کے باپ کو گرفتار کرلیا ہے۔
گرفتار باپ نے اپنے جرم کا اعتراف کرتے ہوئے بچوں کی والدہ کو بھی برابر کا مورد الزام قرار دیا ہے۔
واقعے کے بعد دونوں بچوں کو دیکھ بھال کے لیے ان کی پھوپھی کے حوالے کردیا گیا ہے۔
