کراچی : نارتھ ناظم آباد بلاک ایل میں جھگڑے کے دوران سیکیورٹی گارڈ کے تشدد سے رکشہ ڈرائیور موقع پر ہی جاں بحق ہوگیا، پولیس نے فوری کارروائی کرتے ہوئے ملزم کو گرفتار کرلیا۔
اے آر وائی نیوز کراچی کے نمائندے عدنان راجپوت کے مطابق کراچی کے علاقے نارتھ ناظم آباد بلاک ایل میں شادی ہال کے باہر پارکنگ پر جھگڑا کا واقعہ پیش آیا ہے۔
پولیس کا کہنا ہے کہ 50سالہ رکشہ ڈرائیور محبوب مکا لگنے سے موقع پر ہی جاں بحق ہوا جبکہ رکشہ ڈرائیور محبوب کو تشدد کرکے قتل کرنے والے ملزم ولید کو گرفتار کرلیا گیا ہے، مذکورہ ملزم ولید خان اسی شادی ہال میں سیکیورٹی گارڈ ہے۔
گرفتار ملزم کا ویڈیو بیان اے آر وائی نیوز نے حاصل کرلیا ہے جس میں اس نے بتایا کہ میرا نام ولید خان ہے، پرانی سبزی منڈی کا رہائشی ہوں، ملزم نے بتایا کہ میں نے رکشہ ڈرائیور کو گاڑی ہٹانے کا کہا بات نہ ماننے پر تلخ کلامی ہوئی۔
ملزم ولید نے پولیس کو بیان دیا ہے کہ جھگڑے کے دوران پہلے میں نے دھکا دیا پھر محبوب نے مجھے لات ماری، جواب میں میں نے مقتول کے سینے پر مکا مارا تو وہ زمین پر گرگیا، ملزم کے خلاف قانونی کارروائی شروع کردی گئی ہے۔
دوست نے دوست کی جان لے لی
علاوہ ازیں کراچی میں ایک اور واقعے میں کورنگی نمبر 3 میں فائرنگ سے ایک شخص جاں بحق ہوگیا، پولیس حکام کے مطابق فائرنگ کا واقعہ ذاتی دشمنی کاشاخسانہ ہے۔
ایس ایس پی کورنگی کامران خان نے بتایا کہ مقتول سفیان کے دوست شاہزیب نے فائرنگ کرکے دوست کو قتل کیا،۔
ملزم شاہزیب واقعے کے بعد موقع واردات سے فرار ہوگیا جس کی تلاش جاری ہے، فائرنگ کا یہ واقعہ ملزم شاہزیب کے گھر پر پیش آیا۔
