اسلام آباد: وفاقی وزیر اطلاعات پرویز رشید نے کہا ہے کہ ہمارے لیڈر کی تقریر کو کبھی بھی براہ راست نشر نہیں کیا گیا لیکن ہم اپوزیشن رہنماؤں کی تقاریر سرکاری ٹی وی سمیت تمام جگہ نشر کرواتے ہیں۔
تفصیلات کے مطابق اپوزیشن کے بائیکاٹ کے بعد آج قومی اسمبلی کا ہنگامہ خیزاجلاس جاری ہے۔ اجلاس میں وفاقی وزیر اطلاعات پرویز رشید نے اپنی تقریر میں کہا کہ میں قائد حزب اختلاف اور تمام اپوزیشن اراکین کو دوبارہ خوش آمدید کہتا ہوں۔
انہوں نے کہا کہ جب وزیر اعظم ایوان میں آتے ہیں تو ایوان بھرا ہوا ہوتا ہے، لوگ ان سے محبت کرتے ہیں۔ ہمارے لیڈر کی تقریر کبھی بھی پوری نشر نہیں کی جاتی لیکن ہم اپوزیشن رہنماؤں کی تقاریر سرکاری ٹی وی سمیت تمام جگہ نشر کرواتے ہیں۔
اپوزیشن رہنماؤں کے شور شرابے پر اسپیکر ایاز صادق اور پرویز رشید نے کہا کہ ان کی بات کو سنا جائے، اگر وہ بھی اپوزیشن لیڈر کی تقریر کے موقع پر ایسے ہی شور شرابہ کریں تو یہ مناسب نہیں ہوگا۔ انہوں نے کہا کہ وہ عمران خان کی تقریر کے بعد دوبارہ جوابی تقریر کریں گے۔
