پرویزالہٰی کی عدالتی حکم کے باوجود گرفتاری پر توہین عدالت کے کیس میں تحریری فیصلہ جاری کردیا گیا۔
تفصیلات کے مطابق ہائیکورٹ کے تحریری فیصلے میں کہا گیا ہے کہ ڈی آئی جی آپریشن، ڈی آئی جی انوسٹی گیشن نے تحریری طور پر غیر مشروط معافی مانگ لی ہے۔ مستقبل میں دونوں افسران نے احتیاط کرنے کی یقین دہانی کرائی ہے۔
ہائیکورٹ کو مزید فوجداری کارروائی کی ضرورت نظر نہیں آتی۔ توہین عدالت میں سزا دینے کا اختیار غیرمعمولی طاقت ہے۔
تحریری فیصلے میں کہا گیا ہے کہ جہاں ضروری ہو اس کا استعمال انتہائی احتیاط کےساتھ کیا جاسکتا ہے۔ توہین عدالت کی کارروائی کا مقصد انتقام لینا نہیں ہے۔ اسلام میں بھی معاف کرنے کا ذکر ہے۔
پولیس افسر کے مطابق عدالتی حکم کے بعد گھر کے قریب اسلام آباد پولیس نے پرویزالہٰی گرفتار کیا تھا۔ پولیس افسران کے مطابق اسلام آباد پولیس کے پاس جوڈیشل مجسٹریٹ گرفتاری کا حکم تھا۔
فیصلے میں کہا گیا ہے کہ گرفتاری کے بعد دونوں افسران نے رجسٹرار ہائیکورٹ کو گرفتاری سے متعلق آگاہ کیا۔ جسٹس سلطان تنویر احمد نے 7 صفحات پر مشتمل تحریری فیصلہ جاری کیا۔
