اسلام آباد : نیواسلام آباد ایئرپورٹ پر پسنجر برج گر گیا جس کے باعث آپریٹر زخمی ہوگیا۔
تفصیلات کے مطابق اسلام آباد انٹرنیشنل ایئرپورٹ پرغیرملکی ایئرلائن کے طیارے کے ساتھ پسنجر برج لگایا جا رہا تھا کہ برج گرگیا جس کے نتیجے میں آپریٹر زخمی ہوگیا جسے طبی امداد کے لیے اسپتال منتقل کردیا گیا۔
ایئرپورٹ ذرائع کا کہنا ہے کہ حادثے میں وہاں کھڑا نجی ایئرلائن کا طیارہ محفوظ رہا جبکہ جہاز میں سوار تمام مسافر بھی محفوظ رہے۔ سول ایوی ایشن حکام نے حادثے کی تحقیقات شروع کردی ہے۔
خیال رہے کہ پسنجر برج مسافروں کو جہاز میں سوار کرنے اور باہرلانے کے لیے استعمال کیا جاتا ہے۔
یاد رہے کہ رواں سال یکم مئی میں سابق وزیراعظم شاہد خاقان عباسی نے نیو اسلام آباد انٹرنیشنل ایئرپورٹ کا افتتاح کیا تھا۔
نیواسلام آباد ایئر پورٹ میں آوارہ کتے داخل‘ منیجرعہدے سے برطرف
واضح رہے کہ رواں ماہ ملک کے سب سے بڑے نیو اسلام آباد ایئرپورٹ کے اندر آوارہ کتوں کی موجودگی پر ڈی جی سول ایوی ایشن نے ایکشن لیتے ہوئے منیجر کو عہدے سے برطرف کردیا تھا۔
