ایف آئی اے امیگریشن نے کراچی ایئرپورٹ پر کارروائی کرتے ہوئے جعلی پروٹیکٹر پر قطر جانے کی کوشش ناکام بنا دی۔
جعلی سفری دستاویزات پر قطر جانے والے مسافر آف لوڈ کر دیا گیا جس کی شناخت محمد ریحان کے نام سے ہوئی ہے۔
مسافر جعلی پروٹیکٹر اسٹمپ پر ورک ویزہ کے ساتھ قطر جا رہا تھا۔ امیگریشن کلئیرنس کے دوران مسافر کی دستاویزات مشکوک پائی گئیں۔
دستاویزات کی جانچ پڑتال کے دوران مسافر کی جانب سے پیش کیا گیا ای-پروٹیکٹر جعلی پایا گیا۔ ابتدائی تفتیش کے مطابق مسافر نے ای-پروٹیکٹر کے لیے نہ تو خود درخواست دی اور نہ ہی فنگر پرنٹس دیے۔
گرفتار مسافر ایجنٹ واجد شاہ سے رابطے میں تھا۔
مذکورہ ایجنٹ نے اُسے ای-پروٹیکٹر، ویزہ اور ایمپلائمنٹ کنٹریکٹ فراہم کیا ہے۔ بیورو آف امیگریشن نے ای-پروٹیکٹر کے مکمل طور پر جعلی ہونے کی تصدیق کی ہے۔
مسافر نے ویزہ اور پروٹیکٹر کے حصول کے لیے مذکورہ ایجنٹ واجد شاہ کو 5 لاکھ 80 ہزار روپے ادا کیے۔ مسافر کو آف لوڈ کر کے مزید قانونی کارروائی کے لیے ایف آئی اے اینٹی ہیومن ٹریفکنگ سرکل کراچی کے حوالے کر دیا گیا۔
ترجمان کا کہنا ہے کہ ایف آئی اے کی جانب سے ویزہ فراڈ اور انسانی سمگلنگ میں ملوث عناصر کے خلاف کارروائیاں جاری ہیں عوام سے گزارش ہے کہ ویزہ یا بیرون ملک ملازمت کے لیے صرف قانونی ذرائع اور رجسٹرڈ ایجنٹس سے رجوع کریں۔
