خضدار: بلوچستان کے شہر خضدار کے علاقے اورناچ کے قریب ٹریفک حادثے میں 3 افراد جاں بحق جب کہ متعد دزخمی ہو گئے۔
تفصیلات کے مطابق اورناچ کے قریب ایک مسافر کوچ اور مزدا ٹرک میں ٹکر کے باعث پیش آنے والے حادثے میں تین افراد جان سے ہاتھ دھو بیٹھے جب کہ پندرہ سے زائد زخمی ہو گئے ہیں۔
ریسکیو ذرایع کا کہنا ہے کہ حادثے کا شکار مسافر کوچ تفتان سے کراچی جا رہی تھی کہ اورناچ کراس کے قریب مزدا ٹرک سے ٹکرا گئی، زخمیوں کو خضدار سول اسپتال منتقل کیا گیا ہے، حادثہ تیز رفتاری کے باعث پیش آیا۔
تازہ ترین: پشاور، سی این جی بھرتے ہوئے گاڑی میں ہولناک دھماکا، خاتون جاں بحق
خیال رہے کہ کوئٹہ کراچی شاہراہ کی خستہ حالی اور تنگ سڑکوں کی وجہ سے آئے روز حادثات پیش آتے رہتے ہیں، ان ٹریفک حادثات کی ایک اہم وجہ کوچ ڈرائیوروں کی لاپرواہی بھی ہے۔ کراچی کوئٹہ شاہراہ پر سب سے زیادہ حادثات خضدار اور بیلہ کے درمیان پیش آتے رہے ہیں۔
وڈھ، اورناچ کے مقام پر اس سے قبل بھی حادثات ہوتے رہے ہیں، چند ماہ قبل ٹریفک حادثے کے نتیجے میں 6 افراد زندگی سے ہاتھ دھو بیٹھے تھے، جب کہ 21 افراد زخمی ہوئے، اس کے بعد ایک اور ٹریفک حادثے میں 5 افراد جان سے ہاتھ دھو بیٹھے تھے جب کہ 15 زخمی ہوئے تھے۔
