کراچی : ملکی و غیر ملکی ائیرلائنز بیرون ممالک سے کم مسافر لانے کی شرط میں مزید توسیع کردی گئی ہے جس کے باعث پاکستانیوں کی بڑی تعداد کو امریکا سے وطن واپسی میں مشکلات کا سامنا کرنا پڑہا ہے۔
تفصیلات کے مطابق پاکستان کی جانب سے بین الاقوامی پروازوں میں کم مسافر لانے کی شرط میں15جولائی تک توسیع کردی گئی جس کی وجہ سے دو غیر ملکی ائیر لائنز نے امریکا سے پاکستان کیلئے پروازیں اچانک منسوخ کر دیں۔
اس حوالے سے ذرائع کا کہنا ہے کہ ٹرکش اور قطر ائیر لائنز نے امریکا سے پاکستان کیلئے پروازیں منسوخ کی ہیں، مذکورہ دونوں ائیر لائنز نے ماہ جولائی کے پہلے ہفتے کیلئے پاکستانی مسافروں کی بکنگ کی تھی۔
ذرائع کے مطابق مسافروں کو کورونا وائرس کی تباہ کاریوں سے بچانے کیلئے بیرون ممالک کی پروازوں میں مسافروں کی تعداد پر شرط عائد کیے جانے کے باعث پاکستانیوں کی بڑی تعداد کو امریکا سے وطن واپسی میں مشکلات کا سامنا کرنا پڑرہا ہے۔
غیر ملکی ائیرلائنز نے مسافروں کی تعداد کی شرط میں نرمی کی توقع کر رکھی تھی، پاکستان نے کم مسافروں کی شرط میں نرمی نہیں کی تو بکنگ منسوخ کردی گئی۔
ترجمان سی اے اے کا کہنا ہے کہ غیرملکی ایئرلائنز نے پاکستان کے لئے اوور بکنگ کی، پروازوں کی معطلی، بکنگ کی ذمہ داری متعلقہ ائیرلائن پر عائد ہوتی ہے۔
