کراچی : پاسپورٹ دفاتر میں شہریوں کے غیرمعمولی رش کے پیش نظر ہفتہ 11 فروری کو چھٹی کے روز بھی ملک بھر میں مخصوص ریجنل پاسپورٹ دفاتر کھلے رہیں گے۔
گزشتہ دنوں پاکستانی پاسپورٹ بنوانے کی فیسوں میں اضافے کی افواہ کی خبر سوشل میڈیا پر وائرل ہوئی تھی جس کے بعد پاسپورٹ دفاتر میں غیرمعمولی رش لگ گیا۔
وزارت داخلہ کی جانب سے وضاحت کی گئی کہ مشین ریڈ ایبل پاسپورٹ فیس میں اضافے کی خبریں بے بنیاد ہیں، مشین ریڈ ایبل پاسپورٹ کی فیسوں میں کوئی اضافہ نہیں کیا گیا۔
ڈائریکٹر جنرل امیگریشن اینڈ پاسپورٹ کے دفتر کی جانب سے جاری کیے گئے سرکلر کے مطابق ہفتہ 11 فروری کو سینٹرل پنجاب زون، خیبر پختونخوا زون، ناتھ پنجاب/آزاد کشمیر/ گلگت بلتستان زون، سندھ زون، بلوچستان زون، ساؤتھ پنجاب زون اور ہیڈ کوارٹر زون کے مخصوص رینجنل پاسپورٹ دفاتر کھلے رہیں گے۔
جن شہریوں نے اپنی فیس آن لائن یا بینک میں جمع کروا دی ہے ان کے لیے ہفتہ 11 فروری بروز ہفتہ کو بھی صبح 8 بجے سے دو پہر 2 بجے تک پاسپورٹ دفاتر کھلے رہیں گے۔
ڈائریکٹر امیگریشن اینڈ پاسپورٹ سندھ خالد میمن نے بتایا ہے کہ کراچی سمیت سندھ کے 13 پاسپورٹ دفاتر جن میں حیدرآباد ،لاڑکانہ،سانگھڑ، ٹنڈو اللہ یار،میرپور خاص،خیرپور،قمبر شہداد کوٹ، سکھر، نوابشاہ، دادو، گھوٹکی اور مٹیاری کل کھلے رہیں گے۔
