لاہور : پاکستان کرکٹ بورڈ نے تینوں فارمیٹ کیلئے الگ کپتان اور ریڈ اینڈ وائٹ گیند فارمیٹ کیلئے علیحدہ کوچ مقرر کرنے پر غور کرنا شروع کردیا جبکہ سرفراز احمد کو ٹی ٹونٹی ورلڈ کپ تک کپتان رکھنے کی تجویز ہے۔
تفصیلات کے مطابق پاکستان کرکٹ بورڈ نے تینوں فارمیٹ کیلئے الگ کپتانوں کی تقرری اور ریڈ اور وائٹ گیند فارمیٹ کے لئے الگ الگ کوچ مقرر کرنے پر غور شروع کردیا۔
اس حوالے سے ٹیسٹ میچز کے لئے اظہرعلی اور اسد شفیق قیادت کے مضبوط امیدوار ہیں، ذرائع کا کہنا ہے کہ ون ڈے فارمیٹ میں عماد وسیم کو قیادت سونپی جاسکتی ہے جبکہ بابراعظم کو ٹیسٹ اور ون ڈے ٹیم کا نائب کپتان بنا کرمستقبل کیلئے تیار کیا جائے گا۔
اس کے علاوہ ٹی ٹونٹی ورلڈ کپ تک سرفراز احمد کو کپتان برقرار رکھنے کی تجویز بھی زیر غور ہے، موجودہ کپتان سرفرازاحمد جن کی زیر قیادت پاکستان نے سینتیس میں سے تیس ٹی ٹونٹی میچزمیں فتح حاصل کی ۔
پاکستان آئی سی سی ٹی ٹونٹی رینکنگ میں ایک سال سے ٹاپ پوزیشن پر فائز ہے۔ سرفرازاحمد کو اگلے سال آسٹریلیامیں شیڈول ٹی ٹونٹی ورلڈکپ تک اس فارمیٹ کاکپتان برقرار رکھنے کی تجویز ہے۔
علاوہ ازیں ریڈ بال سے ٹیسٹ میچز اور وائٹ بال سے محدود اوورز کرکٹ کے لئے الگ الگ ہیڈ کوچ اور کوچنگ اسٹاف کی تقرری بھی زیرغورہے۔
اس تجویز پرعمل کی صورت میں مکی آرتھر اوران کے معاون کوچز ٹی ٹونٹی ورلڈ کپ تک اپنے عہدوں پر برقرار رکھے جائیں گے، ذرائع کا مزید کہنا ہے کہ ٹیسٹ ٹیم کی کوچنگ کے لیے سابق زمبابوین بیٹسمین اورانگلینڈ کے سابق کوچ اینڈی فلاورمضبوط امیدوار ہیں۔
