چیئرمیین پی سی بی محسن نقوی نے بنگلہ دیش کے خلاف ٹیسٹ سیریز کے لیے شان مسعود کو کپتان برقرار رکھنے کی تصدیق کردی۔
چیئرمین پی سی بی محسن نقوی نے میڈیا سے گفتگو کرتے ہوئے بتایا کہ شان مسعود سے ویڈیو کال کے ذریعے ٹیسٹ کرکٹ میں ٹیم کی بہتری سے متعلق بات ہوئی ہے۔
انہوں نے واضح کیا کہ شان مسعود کو قومی ٹیم کے ٹیسٹ کپتان کے عہدے سے ہٹانے کا کوئی فیصلہ نہیں کیا گیا، 34 سالہ اوپننگ بیٹر ٹیسٹ میں ٹیم کی قیادت کرتے رہیں گے۔
محسن نقوی نے کہا کہ بہت سے لوگوں نے شان مسعود کی قیادت کے بارے میں مثبت رائے دی ہے۔
انہوں نے بتایا کہ بنگلہ دیش کے خلاف ٹیسٹ سیریز کے لیے وینیو کو حتمی شکل دے دی گئی ہے جو کہ ملتان، کراچی یا راولپنڈی ہوں گے کیونکہ قذافی اسٹیڈیم میں اپ گریڈیشن کا کام جاری ہے۔
واضح رہے کہ پاکستان اور بنگلہ دیش کے درمیان دو میچوں کی سیریز آئی سی سی ٹیسٹ چیمپئن شپ کا حصہ ہے۔
