لاہور: پاکستان کرکٹ بورڈ (پی سی بی) نے بھارت کی جانب سے ایشیا کپ 2023 کے لیے ٹیم کو پاکستان نہ بھینجے کے فیصلے پر اے سی سی کو خط لکھ دیا۔
ذرائع کے مطابق پی سی بی نے اپنے خط میں ایشین کرکٹ کونسل ( اے سی سی) سے ہنگامی اجلاس بلانے کا مطالبہ کر دیا ہے۔
ذرائع کا کہنا ہے کہ پی سی بی کی جانب سے لکھے گئے خط میں بھارتی ٹیم کو پاکستان نہ بھیجنے کے معاملے پر شدید تحفظات کا اظہار کیا گیا ہے اور بھارتی بورڈ کے سیکریٹری جے شا کے بیان کی سخت الفاظ میں مذمت کی گئی ہے۔
واضح رہے کہ گزشتہ روز بھارتی کرکٹ بورڈ کے سیکریٹری جے شاہ (جو اے سی سی کے صدر بھی ہیں) نے گزشتہ روز اپنے بیان میں خود ساختہ فیصلہ سناتے ہوئے ایشیا کپ نیو ٹرل وینیو پر کھیلنے کا بیان دیا تھا۔
بھارتی کرکٹ بورڈ کے سیکریٹری جے شاہ کے بیان کے بعد پاکستان کرکٹ بورڈ کا ہنگامی اجلاس طلب کیا گیا تھا۔ اس ہنگامی اجلاس میں ایشین کرکٹ کونسل سے علیحدگی اور آئندہ برس بھارت میں ہونے والے ون ڈے ورلڈ کپ میں شرکت سے انکار سمیت مختلف آپشنز پر غور کیا گیا۔
