اسلام آباد: پاکستان کرکٹ بورڈ کے اقدام کے خلاف اسپورٹس صحافی عدالت پہنچ گئے، ان کا مدعا تھا کہ صحافیوں کو کوریج سے روکنا آئین کی خلاف ورزی ہے۔
پاکستان کرکٹ بورڈ کی جانب سے صحافیوں کو کوریج سے روکنے کا معاملہ عدالت پہنچ گیا، اسپورٹس جرنلسٹس نے ایک درخواست کے ساتھ اسلام آباد ہائیکورٹ سے رجوع کر لیا ہے، درخواست میں وفاق، پیٹرن انچیف وزیر اعظم، سیکریٹری کابینہ، اور پاکستان کرکٹ بورڈ کے چیئرمین محسن نقوی کو فریق بنایا گیا ہے۔
عدالت میں یہ درخواست عبدالواحد قریشی ایڈووکیٹ کے ذریعے دائر کی گئی ہے، جس میں کہا گیا ہے کہ اسپورٹس جرنلسٹس متعدد نیشنل اور انٹرنیشنل کرکٹ مقابلوں کی کوریج کر چکے ہیں،کئی ورلڈ کپ،ورلڈ ٹی ٹوئنٹی اور چیمپئنز ٹرافیز بھی کور کی گئی ہیں، لیکن اب پی سی بی نے کوریج کے آئینی حق سے صحافیوں کو محروم کر دیا ہے۔
صحافیوں نے درخواست میں مؤقف اختیار کیا ہے کہ پاکستان کرکٹ بورڈ کی جانب سے صحافیوں کو کوریج سے روکنا آئین کی خلاف ورزی ہے، پی سی بی کو ٹیم پرفارمنس کے بعد ہونے والی تنقید گراں گزری ہے، لیکن صحافیوں کو کوریج سے روکنا آزادئ صحافت کے خلاف ہے۔
