خیبر پختونخوا حکومت کے مشیر اطلاعات بیرسٹر ڈاکٹر محمد علی سیف نے کہا ہے کہ حکومت نے پیکا کالے قانون پر میڈیا سے دھوکا کیا۔
اے آر وائی نیوز کے مطابق خیبر پختونخوا حکومت کے مشیر اطلاعات بیرسٹر ڈاکٹر محمد علی سیف نے اپنے بیان میں کہا ہے کہ فیک حکومت، فیک نیوز کی آڑ میں فیک قانون لا رہی ہے۔ حکومت نے پیکا کالے قانون پر میڈیا سے دھوکا کیا ہے اور اس کا مقصد میڈیا کو زہر کا ٹیکا لگانا ہے۔
بیرسٹر سیف نے کہا کہ جو حکومت میڈیا سے دھوکا کرے، وہ پی ٹی آئی سے مذاکرات میں کیسے مخلص ہو سکتی ہے۔ جس مذاکراتی کمیٹی میں عرفان صدیقی شامل ہوں، وہ کمیٹی کبھی بھی کامیاب نہیں ہوئی۔
ان کا کہنا تھا کہ بانی پی ٹی آئی عمران خان اڈیالہ جیل میں آزاد جب کہ شریف خاندان رائیونڈ میں قید ہو چکا ہے۔ ایون فیلڈ شریف خاندان کے لیے پریزن فیلڈ بن چکا ہے۔
واضح رہے کہ پیکا آرڈیننس کو ملک بھر کی صحافتی تنظیموں کی جوائنٹ ایکشن کمیٹی پہلے ہی مسترد کر کے اس کے خلاف ملک گیر احتجاج اور عدالت سے رجوع کرنے کا اعلان کر چکی ہے۔
صحافتی تنظیموں کے اس قانون کے خلاف ملک کے مختلف شہروں میں احتجاج کا سلسلہ شروع بھی ہو چکا ہے جس میں حکومت سے یہ قانون واپس لینے کا مطالبہ کیا گیا ہے۔
