اسلام آباد: وزارتِ داخلہ نے نیشنل ایکشن پلان کے تحت جماعت الدعوۃ، فلاح انسانیت اورلشکر طیبہ نامی تنظیموں کی میڈیا کوریج پرپابندی عائد کردی ہے۔
تفصیلات کے مطابق وزارتِ داخلہ نے مذکورہ تنظیموں کی میڈیا کوریج پر پابندی عائد کرنے کا فیصلہ نیشنل ایکشن پلان کے تحت کیا ہے جس میں ملک بھر دہشت گردی کے سدِ باب کے لئے فوجی اور انتظامی کاروائیاں جاری ہیں۔
واضح رہے کہ حافظ سعید کی سربراہی میں کام کرنے والی تنظیم جماعت الدعوہ کو امریکہ اوراقوام متحدہ نے کالعدم تنظیموں کی فہرست میں شامل کررکھا ہے۔
حکومت پاکستان نے ابھی تک جماعت الدعوہ کے خلاف کوئی اقدام نہیں کیا تھا تاہم اب حکومت پاکستان نے جماعت الدعوہ کی میڈیا کوریج پر پابندی عائد کردی ہے۔
وزارت داخلہ زرائع کے مطابق یہ فیصلہ نیشنل ایکشن پلان کے تحت کیا گیا ہے اورپیمرا نے اس حوالے سے نوٹی فکیشن جاری کردیا ہے۔
جماعت الدعوہ کے علاوہ فلاح انسانیت اورلشکرِطیبہ نامی دیگردو تنظیموں کی میڈیا کوریج پرپابندی عائد کی ہے۔
واضح رہے کہ نیشنل ایکشن پلان جنوری 2015 میں آرمی پبلک اسکول پردہشت گردوں کے بہیمانہ حملے کے بعد وضع کیا گیا تھا جس میں فیصلہ کیا گیا تھا کہ ملک کے قبائلی علاقوں میں بالخصوص اور پورے ملک میں دہشت گردوں اور ان کے معاونت کاروں کے خلاف بلا امتیاز کاروائیں کی جائیں گی۔
آرمی پبلک اسکول پشاورپر 16 دسمبر 2014 کو مسلح دہشت گردوں نے منظم حملہ کیا تھا کہ جس میں 132 طلبہ سمیت کل 145 افراد شہید ہوئے تھے۔
