گوادر کی ترقی و خوشحالی کے دشمن اور شرپسند پہچانے گئے،’حق دو تحریک‘کے سرپرست مولانا ہدایت الرحمان شرپسند عناصر کی سربراہی کررہے ہیں۔
اس حوالے سے ذرائع کا کہنا ہے کہ ’حق دو تحریک‘ درحقیقت گوادر کے عوام سے ترقی وخوشحالی کا حق چھیننے کی سازش ہے۔
مولانا ہدایت الرحمان پرکشش نعروں سے عوام کو گمراہ کررہے ہیں وہ اپنے اقدامات سے ترقیاتی منصوبوں کیخلاف احتجاج کو ہوا دے رہے ہیں، گزشتہ دو ماہ سے گوادر کے معمولات زندگی کو یرغمال بنایا گیا اور امن پسندی کے نام پر تشدد کو ہوا دی جا رہی ہے۔
ذرائع کا کہنا ہے کہ ترقیاتی منصوبے مکمل ہوئے بغیر گوادر تو کیا کسی بھی شہر کی ترقی ممکن نہیں، مولانا ہدایت الرحمان عوام کو ریاست اور اداروں کیخلاف اکسانے کی سازش میں کھلے عام ملوث ہورہے ہیں۔
حق دو تحریک کے ناجائز مطالبات کے باوجود ماضی میں بھی حکومت نے سمجھانے کی کوششیں کی تھیں لیکن مولانا ہدایت الرحمان کے مذموم مقاصد ہر حکومتی کوشش کے آڑے آگئے۔ حکومت کی بات چیت کی ہرکوشش کا جواب پرتشدد طرز عمل سے دیاجارہا ہے۔
ذرائع کا کہنا ہے کہ ریاستی ادارے اب کسی شرپسند کو گوادر،بلوچستان یا ملک کے مستقبل سے کھیلنے کی اجازت ہرگز نہیں دیں گے، یہ فیصلہ کرلیا گیا ہے کہ ریاست ایسے شرپسندوں سے سختی کے ساتھ نمٹے گی، گوادر کے عوام ریاست کی رٹ کو چیلنج کرنے والوں کو ہمیشہ کی طرح مسترد کرنے کیلئے پُرعزم ہیں۔
اس حوالے سے متعلقہ حکام کا کہنا ہے کہ گوادر میں کسی تخریبی احتجاج کی اب قطعاً اجازت نہیں ہوگی، حکومت کسی بھی تخریبی و پریشر گروپ کی بلیک میلنگ میں نہیں آئے گی، مولانا ہدایت الرحمان کی شرپسندی پر بھی قانون نافذ کرنے والے اداروں کی مکمل نظریں ہیں۔
