آج صوبے بھر میں سندھ کا یوم ثقافت جوش و خروش سے منایا جا رہا ہے اس موقع پر پیپلز بس سروس بھی سندھ کے ثقافتی رنگوں میں ڈھل گئی ہے۔
اے آر وائی نیوز کے مطابق آج سندھ کا یوم ثقافت بھرپور جوش و جذبے کے ساتھ صوبے بھر میں منایا جا رہا ہے۔ مختلف سیاسی، سماجی اور ثقافتی تنظیموں کی جانب سے ہزاروں سال قدیم ثقافت کو اجاگر کرنے کے لیے تقریبات کا انعقاد کیا جا رہا ہے وہیں پیپلز بس سروس بھی سندھ کے ثقافتی رنگوں میں ڈھل گئی ہے۔
پیپلز بس سروس کی انتظامیہ نے سندھی ثقافت کے دن پر عوام کو مبارکباد پیش کرتے ہوئے اس دن کو بھرپور انداز میں منانے کا فیصلہ کیا ہے۔
آج کراچی، حیدرآباد اور لاڑکانہ میں پیپلز بس سروس کا عملہ ثقافتی رنگوں میں سج گیا ہے اور سب سے اجرک اور سندھی ٹوپی پہن لی ہے۔
کراچی میں رات گئے عملے نے روایتی سندھی دھنوں پر رقص کیا اور ہزاروں سال قدیم ثقافت سے محبت کا اظہار کیا۔
یہ بھی پڑھیں: ’سندھ ثقافت کی ماں موئن جو دڑو ہے‘
یوم سندھی ثقافت کے موقع پر پیپلز بس انتظامیہ کی جانب سے اہل حیدرآباد کے لیے خصوصی اعلان کیا گیا ہے اور کہا گیا ہے کہ اب حیدرآباد میں 5 کلومیٹر تک سفر کرنے والے مسافروں سے 30 روپے کرایہ وصول کیا جائے گا۔
