اسلام آباد : پاکستان میں سونے کی درآمد کی اجازت کے حوالے سے سینیٹ کی قائمہ کمیٹی برائے تجارت کا اجلاس ہوا جس میں سیکریٹری تجارت اور دیگر متعلقہ حکام نے شرکت کی۔
اجلاس میں اظہار خیال کرتے ہوئے سیکریٹری تجارت نے کہا کہ سونے کی درآمد کی اجازت کا معاملہ اسٹیٹ بینک نے حل کرنا ہے۔
سیکریٹری تجارت نے کہا کہ سونے کی پاکستان میں قانونی طور پر درآمد کی اجازت نہیں دی جاسکتی، پاکستان میں یہ شعبہ دستاویزی نہیں جو درآمد میں اصل رکاوٹ ہے۔
حکام وزارت تجارت کا کہنا تھا کہ پورے شعبے کو دستاویزی کردیا جائے تو پھردرآمد کی اجازت دی جاسکتی ہے، سال 2013میں سونے کی درآمد کی اجازت دی گئی تھی۔
انہوں نے کہا کہ اس سے زیورات کی برآمدات ایک ارب ڈالر ہوگئیں، تاہم اس عرصے میں سونے کی درآمدات صرف 35 کروڑ ڈالر رہیں۔
اجلاس میں اظہار خیال کرتے ہوئے سینیٹر فدا محمد نے کہا کہ اسٹیٹ بینک امریکی ڈالر کی کمی کے باعث سونے کی درآمد کی اجازت دینے کو تیار نہیں ہے۔
واضح رہے کہ پاکستان میں مہنگائی کی بڑھتی ہوئی شرح کے باعث سونے کے زیورات کی طلب میں نمایاں کمی دیکھی گئی ہے، خاص طور پر شادیوں کیلئے زیورات کی خریداری میں کمی کی وجہ لوگوں کی قوت خرید نہ ہونا ہے۔
دوسری جانب سونے کے بسکٹوں میں بہت زیادہ سرمایہ کاری ہو رہی ہے، جس کی وجہ سے ملک میں سونے کی قیمت میں حالیہ مہینوں میں بہت زیادہ اضافہ دیکھنے میں آیا اور سونے کی قیمت 165000 روپے سے زائد فی تولہ تک پہنچ گئی جو ملکی تاریخ میں سونے کی قیمت کی بلند ترین سطح ہے۔
