کروڑ پتی بننے کے خواہشمند لوگوں کے لیے امریکی سرمایہ کار نے ایک پیشکش کی ہے کہ وہ چھپا ہوا خزانہ تلاش کریں اور کروڑ پتی بن جائیں۔
امریکن بزنس مین اور کریپٹو سرمایہ کار جون کالنس نے امریکا میں پانچ مختلف مقامات پر خزانے دفن کرنے کا اعلان کیا ہے جن میں قیمتی اشیاء موجود ہیں اور ان کی مالیت تقریباً 2 ملین ڈالرز کے قریب ہے، اب کوئی بھی شخص انھیں ڈھونڈ کر کروڑ پتی بن سکتا ہے۔
بٹ کوائن میں سرمایہ کاری کے بعد جون پر دولت کی برسات ہوئی اور اب وہ دوسروں کو بھی دولت مند بنانے کے درپے ہیں، وہ خزانہ تلاش کرنے کے خواہشمند لوگوں کے لیے ایک شاندار خزانہ ڈھونڈنے کا چیلنج لائے ہیں۔
جون کالنس کے مطابق وہ بچپن سے قیمتی خزانہ تلاش کرنے کا خواب دیکھتے تھے، لیکن ان کا خواب تو پورا نہ ہوسکا تاہم انہوں نے دوسروں کے خواب پورا کرنے کا فیصلہ کیا ہے۔
کرونا کے وبائی مرض کے دوران کریپٹو سرمایہ کار نے پانچ مختلف خزانے کے صندوق بھرنے کے لیے قیمتی اشیا اکٹھی کرنا شروع کیں اور پھر امریکہ میں انھیں پانچ مخلتف مقامات پر دفن کر دیا، پانچ صندوقوں میں سے کوئی ایک بھی جون کی ذاتی جائیداد میں نہیں چھپایا گیا۔
بزنس مین نے بتایا کہ ان خزانوں کی تلاش کرنے کے لیے نشانیوں کی ایک فہرست ہوگی اور ذہین دماغ اسے ڈھونڈ سکتے ہیں، خزانہ کہاں ہے یہ راز صرف وہی جانتے ہیں، لہٰذا ان کی فیملی اور دوستوں سے پوچھنے کا کوئی فائدہ نہیں۔
اگر کوئی اس خزانے کو تلاش کرلیتا ہے تو اسے امریکی تاریخ کا سب سے بڑا خزانہ تلاش کرنے والا گردانا گا، مہم کا آغاز کرنے کے لیے جو معلومات درکار ہیں، وہ کالنس بلیک کی کتاب ’دیئر از ٹریژر انسائیڈ‘ میں موجود ہیں۔
