لاہور: چوہدری پرویز الہٰی، مونس الہٰی و دیگر کے خلاف گجرات منصوبوں میں کک بیکس کی تحقیقات مکمل ہو گئیں، نیب نے ان کے خلاف ایک ارب 23 کروڑ کا ریفرنس دائر کر دیا۔
تفصیلات کے مطابق نیب نے گجرات منصوبوں میں کک بیکس پر ایک ارب 23 کروڑ کا ریفرنس احتساب عدالت لاہور میں دائر کر دیا، جس میں پرویز الہٰی اور ان کے بیٹے مونس الہٰی مرکزی ملزم نامزد کیے گئے ہیں۔ نیب نے ریفرنس میں استدعا کی ہے کہ احتساب عدالت ٹرائل کر کے ملزمان کو سزا دے۔
نیب ریفرنس میں کہا گیا ہے کہ پرویز الہٰی، مونس الہٰی اور دیگر ملزمان قومی خزانے کو نقصان پہنچانے میں قصور وار پائے گئے ہیں، پرویز الہٰی نے اپنے عہدے کا ناجائز استعمال کیا اور رشوت وصول کی۔
ریفرنس کے مطابق پرویز الہٰی اور ان کے بیٹے نے گجرات کے لیے غیر قانونی طور پر 116 اسکیمیں منظور کرائیں، دونوں نے من پسند ٹھیکے داروں کو کنٹریکٹ دلوا کر رشوت وصول کی، رشوت اور کک بیکس کی مد میں ملزمان نے مل کر 1 ارب 23 کروڑ روپے سے زائد کا مالی فائدہ لیا۔
ریفرنس کے مطابق پرویز الہٰی نے سب سے زیادہ 74 کروڑ 45 لاکھ روپے کک بیکس کی مد میں وصول کیے، مونس الہٰی کا اکاؤنٹنٹ کک بیکس کی رقم ان کی فیملی کے اکاؤنٹس میں جمع کراتا رہا، مونس نے 10 لاکھ 61 ہزار یورو اپنے غیر ملکی بینک اکاؤنٹ میں جمع کرائے۔
ریفرنس میں کہا گیا ہے کہ پرویز الہٰی کی وزارت اعلیٰ کے دوران ان کی فیملی نے 304 ملین سے زائد رقم ذاتی اکاؤنٹس میں جمع کرائی۔
