اسلام آباد: وفاقی وزیراطلاعات پرویز رشید پاکستان تحریک انصاف کے سربراہ عمران خان کو مخاطب کرتے ہوئے کہا کہ کہ عمران خان پچھلی بار مٹھائی کھانے کے شوق میں چھوارے کھاکر ناکام واپس گئے تھے اور اب کی بار بھی چھواروں پر ہی اکتفا کرنا پڑے گا۔
اسلام آباد میں میڈیا سے بات کرتے ہوئے وزیراطلاعات سینیٹر پرویزرشید نے کہا کہ عمران خان نے حکومت مخالف تحریک کا اعلان بہت غلط وقت پر کیا اس سے قبل بھی وہ دھرنے کی شکل میں قوم کا وقت ضائع کرچکے ہیں اور مٹھائی کھانے کے شوق میں سڑکوں پر نکلے تھے لیکن چھوارے کھا کر ناکام اور نامراد بنی گالا واپس جانا پڑا تھا اس بار بھی 7 اگست سے شروع ہونے والے احتجاج میں بھی چھواروں پر ہی اکتفا کرنے پڑے گا اس بار بھی وہ ناکام ہوں گے۔
مزید جانیے : پاکستان میں فوج آئی تو لوگ مٹھائی تقسیم کریں گے، عمران خان
وزیر اطلاعات نے وضاحت دی کہ موجودہ حکومت نے مسئلہ کشمیر کو دنیا بھر میں اجاگر کیا اور وزیر اعظم نواز شریف نے کشمیر کے مسئلے کو اقوام متحدہ کی جنرل اسمبلی میں بھی اٹھایا، حکومت بھارتی مظالم کو اجاگر کرکے قومی فریضے کو ادا کررہی ہے اور پاکستان ہمیشہ کشمیریوں کی سیاسی و اخلاقی حمایت جاری رکھے گا۔
آزاد کشمیر میں جاری الیکشن کے حوالے سے پوچھے گئے ایک سوال کے جواب میں پرویز رشید کا کہنا تھا کہ آزاد کشمیرمیں شفاف اورمنصفانہ ماحول میں انتخابات ہوئے ہیں اور کسی امیدوار نے کوئی سرکاری وسائل استعمال نہیں کیے،عوام نے بھی آزادانہ طور پر اپنی قیادت کے انتخاب کے لیے حق رائے دہی استعمال کیا، اب کشمیری جسے ووٹ دیں اسے تسلیم کریں گے اور منتخب ہونے والا نمائندہ ہمارے سر کا تاج ہوگا۔
صوبہ سندھ میں جاری رینجرز کے اختیارات پر کشیدگی پر وفاقی وزیر اطلاعات پرویز رشید نے میڈیا کو بتایا کہ کراچی میں امن قائم رکھنے کے لیے تمام جماعتوں سے مشاورت کی ہے، شہر قائد میں امن قائم کرنے میں فورسز نے بہت سی قربانیاں پیش کیں لیکن رینجرز کے سندھ میں قیام سے متعلق وفاقی چوہدری نثار اپنا کردار ادا کرر ہے ہیں اور اب بھی امن کی کوششوں کو اتفاق رائے سے جاری رکھا جائے گا۔