پشاور: سابق وزیر اعلیٰ خیبر پختونخوا و رہنما پاکستان تحریک انصاف پارلیمنٹیرینز پرویز خٹک نے سیاست میں دوبارہ متحرک ہونے کا اعلان کر دیا۔
پرویز خٹک نے اپنے ایک بیان میں کہا کہ ایک سال کی سیاسی خاموشی ختم کر رہا ہوں، 22 فروری 2025 کو نوشہرہ میں جلسے میں عوامی قوت کا مظاہرہ کروں گا۔
انہوں نے کہا کہ اپنے بھائی لیاقت خٹک سے صلح کر لی ہے اب دونوں مل کر جلسہ کریں گے۔ یاد رہے کہ لیاقت خٹک نے پی ٹی آئی چھوڑنے کے بعد جے یو آئی (ف) میں شمولیت اختیار کی تھی۔
یہ بھی پڑھیں: پرویز خٹک پی ٹی آئی پارلیمنٹیرینز کی چیئرمین شپ سے مستعفی
23 جنوری 2025 کو پرویز خٹک نے اپنے ایک بیان میں کہا تھا کہ میں مذاق نہیں کر رہا میری حکومت آنے والی ہے، جتنی بھی حکومتیں گزری ہیں کیا انہوں نے کبھی عوام کی خدمت کی؟
سابق وزیر اعلیٰ کے پی کا کہنا تھا کہ ملک میں غریب کا کوئی پرسان حال نہیں، یہ فرق کون ختم کرے گا کہ غریب کا بچہ مزدور اور امیر کا بچہ افسر بنے گا؟ میں نے اپنے دور حکومت میں اسکولوں میں اساتذہ کی حاضری یقینی بنائی۔
’جب میں وزیر اعلیٰ بنا تو اسپتالوں میں ڈاکٹرز کی حاضری یقینی بنائی، تھانے میں غریب پر بدمعاشی چلتی تھی میں نے یہ سب ختم کیا، اپنے دور میں تھانے میں غریب کو سہولیات فراہم کیں، ایوب خان کے دور میں پاکستان ترقی کر رہا تھا ملک پر قرضہ نہیں تھا۔‘
رہنما پی ٹی آئی پارلیمنٹیرینز نے کہا تھا کہ بدترین پالیسیوں کی وجہ سے ملک کو مقروض کیا گیا، اب قرض واپس کرتے ہیں تو پاکستان کے پیسے نہیں ہوتے کیونکہ آئی ایم ایف سخت شرائط پر قرضہ فراہم کرتا ہے، یہ تمام لیڈر قوم کے ہمدرد نہیں ان کے دشمن ہے۔
یہ بھی پڑھیں: بانی پی ٹی آئی ذہنی بیمار ہیں، پرویز خٹک
پرویز خٹک نے کہا تھا کہ قوم کے حقیقی مجرم کرپٹ سیاستدان ہیں، وزیر اعظم نے قرضے لیے لیکن ملک کو پاؤں پر کھڑا نہ کیا، عوام نے مجرمان کو نہ پہچانا تو مزید نقصان ہوگا۔
اڈیالہ جیل میں قید سابق وزیر اعظم پر تنقید کرتے ہوئے پرویز خٹک نے کہا تھا کہ عمران خان نے کہا نیا پاکستان بنائیں گے تو میں نے ان کا ساتھ دیا، میرے بغیر وہ خیبر پختونخوا میں حکومت نہیں بنا سکتے تھے، انہوں نے کہا میرے دور میں انصاف ہوگا، کہاں انصاف ہوا؟
’عمران خان نے کہا قرضہ لیا تو خودکشی کر لوں گا۔ انہوں نے قرضہ لیا تو خودکشی کیوں نہیں کرتے؟ بانی پی ٹی آئی ملک کو ٹھیک نہیں کر سکتا جھوٹ بول رہا ہے۔ ایماندار لیڈر آئیں گے تو ملک کی تقدیر بدل جائے گی۔ قوم کو مخلص اور ایماندار قیادت کی ضرورت ہے۔‘
