The news is by your side.

Advertisement

پشاور: ملازمین کو ویکسین نہ لگانے پر ریسٹورنٹس، شاپنگ مالز کے خلاف بڑی کارروائی

پشاور: خیبر پختون خوا کے دارالحکومت پشاور میں اسٹاف کو کرونا ویکسین نہ لگانے پر متعدد ریسٹورنٹس اور شاپنگ مالز سیلز کر دیے گئے۔

تفصیلات کے مطابق پشاور میں ہوٹلز اور ریسٹورنٹس اسٹاف کے لیے کرونا وائرس کی ویکسین لازمی قرار دی گئی ہے، جس کے بعد کرونا ضابطہ اخلاق کی خلاف ورزی پر بڑے پیمانے پر کارروائیاں شروع کر دی گئی ہیں۔

ضلعی انتظامیہ پشاور نے ملازمین کو کرونا ویکسین نہ لگانے والوں کے خلاف کارروائی کرتے ہوئے صدر میں مشہور الیکٹرانکس شاپ، چارسدہ روڈ پر 4 ریسٹورنٹس اور 2 شاپنگ مالز کو سیل کر دیا ہے۔

انتظامیہ نے ایس او پیز کی خلاف ورزی پر 12 دکانیں بھی سیل کر دیں، جب کہ 33 دکان داروں کو گرفتار کر لیا گیا ہے۔

ڈپٹی کمشنر پشاور نے بتایا کہ کرونا وائرس خطرناک ہے، عوام اور تاجر برادری ایس او پیز پر عمل کر کے کرونا وائرس کے پھیلاؤ کو روکنے میں انتظامیہ کی مدد کریں۔ انھوں نے کہا تاجر برادری خود بھی ویکسین لگائے اور اپنے اسٹاف کو بھی جلد از جلد کرونا ویکسین لگائے، جو ویکسین نہیں لگائے گا ان کے خلاف کارروائی ہوگی۔

ضلعی انتظامیہ نے گزشتہ رات بھی کارروائی کرتے ہوئے اسٹاف کو کرونا ویکسین نہ لگانے پر 118 افراد کو گرفتار کیا تھا۔

Comments

یہ بھی پڑھیں