کراچی : اے ایس ایف نے پشاور ایئر پورٹ پر اسمگلنگ کرنے کو شش ناکام بناتے ہوئے مسافر کے بیگ سے ہیروئن برآمد کرلی، ملزم کو اے این ایف کے حوالے کردیا گیا۔
تفصیلات کے مطابق پشارو کے باچا خان انٹر نیشنل ایئرپورٹ پر اے ایس ایف نے کامیاب کاروائی کرتے ہوئے دبئی ہیروئن اسمگل کرنے کی کوشش ناکام بنادی، مسافر سے نو کلو سے زائد ہیروئن برآمد کر کے ملزم کو حراست میں لے لیا گیا۔
مسافر نے بیگ کے خفیہ خانوں میں ہیروئن چھپا رکھی تھی، اس حوالے سے ایئرپورٹ ذرائع کا کہنا ہے کہ مسافر غیر ملکی ایئر لائن کی پرواز ای کے637 کے ذریعے دبئی جارہا تھا۔
سول ایوی ایشن اتھارٹی قائم کردہ جوائنٹ بیگج سرچ کاؤنٹر پر اے ایس ایف اہلکاروں نے مسافر کے سامان کی تلاشی لی تو اس کے بیگ کے خفیہ خانوں میں چھپائی گئی نو کلو ہیروئن برآمد کرلی گئی۔
مزید تفتیش کیلئے مسافر کو اے این ایف کے حوالے کردیا گیا ہے، مذکورہ ہیروئن کی مالیت عالمی مارکیٹ میں کروڑوں روپے بتائی جارہی ہے، باچا خان ایئر پورٹ پر یہ رواں سال کی سب سے بڑی کاروائی ہے۔
