پشاور : خیبر پختونخوا حکومت نے پشاور ایئرپورٹ پر رات کے اوقات میں جہازوں کے اترنے کی اجازت دے دی، یہ پابندی گزشتہ پانچ سال سے عائد تھی۔
تفصیلات کے مطابق خیبر پختونخوا حکومت نے باچاخان ایئرپورٹ پشاور پر نائٹ لینڈنگ کی اجازت دے دی ہے، سیکیورٹی وجوہات پر ایئرپورٹ پر نائٹ آپریشن سال 2014سے معطل تھا اور کوئی جہاز رات کے اوقات میں ایئرپورٹ پر نہیں اتر سکتا تھا۔
اس حوالے سے کے پی ہوم اینڈ ٹریول افیئرز ڈیپارٹمنٹ کی جانب سے نوٹیفکیشن جاری کردیا گیا ہے، ڈی جی سول ایوی ایشن اتھارٹی کو بھی بحالی کا نوٹی فکیشن جاری کیا گیا۔
ذرائع کے مطابق سول ایوی ایشن اتھارٹی (سی اے اے) پشاور ایئرپورٹ پر نائٹ لینڈنگ سے متعلق نوٹم جاری کرے گا، نوٹم کے بعد پشاور ایئرپورٹ پر رات کے اوقات میں آپریشن شروع ہوجائے گا۔
