پشاور : آئی جی خیبرپختونخوا معظم جاہ انصاری نے خدشہ ظاہر کیا ہے کہ پشاور دھماکے میں جماعت الاحرار کے کچھ لوگ ملوث ہوسکتے ہیں۔
تفصیلات کے مطابق آئی جی خیبرپختونخوا معظم جاہ انصاری نے پریس کانفرنس کرتے ہوئے پشاور دھماکے کی تحقیقات کے حوالے سے بتایا کہ حملہ آور کے سہولت کار کا پتہ لگا رہے ہیں اور ایک مہینے کی سی سی ٹی وی فوٹیج دیکھ رہے ہیں۔
معظم جاہ انصاری نے بتایا کہ دھماکے میں 10سے12کلو بارودی مواد استعمال کیا گیا تاہم جلد جے آئی ٹی میں سب کچھ واضح ہوجائے گا اور دھماکے میں ملوث تمام کرداروں کاتعین کریں گے۔
ان کا کہنا تھا کہ پولیس لائن میں ہر روز کئی سو افراد کی آمدورفت ہوتی ہے، یہاں ڈی آئی جی سطح کے افسران موجود ہوتے تھے، جس جگہ لیپس ہوا ہے اس کی تحقیقات کر رہے ہیں۔
آئی جی خیبرپختونخوا نے کہا کہ ریسکیو آپریشن مکمل ہوچکا ہے، چیف سیکریٹری نے ریسکیو کے عمل کو ساری رات سپروائز کیا ہے، اس طرح کے واقعات کی روک تھام کیلئے اقدامات کریں گے۔
معظم جاہ انصاری نے خدشہ ظاہر کیا کہ پشاور دھماکے میں جماعت الاحرار کچھ لوگ ملوث ہوسکتے ہیں تاہم تحقیقات جاری ہیں، موجودہ واقعے میں ملوث لوگوں کو کیفر کردار تک پہنچائیں گے۔
