پشاور : خودکش دھماکے کا نشانہ بننے والی مسجد کے ملبے سے زخمیوں اور لاشیں نکالنے کا سلسلہ جاری ہے، سینسر ڈیوائسز لگا کر زندہ افراد کوتلاش کیا جارہا ہے۔
تفصیلات کے مطابق پشاور میں خودکش دھماکے کا نشانہ بننے والی مسجد میں ریسکیو آپریشن آخری مراحل میں داخل ہوگیا۔
ریسکیوحکام کا کہنا ہے کہ ریسکیو آپریشن کے دوران ملبہ ہٹانے کا کام جاری ہے ، جس میں ملبے سے لاشیں نکالی جارہی ہے اور سینسر ڈیوائسز لگا کر زندہ افراد کو تلاش کیا جارہا ہے۔
بھاری مشینری اور کٹر کی مدد سے آخری کنکریٹ ستون کاٹا جارہا ہے، زخمیوں کے دبے ہونے کی وجہ سے ریسکیو آپریشن مکمل کرنے میں دشواری کا سامنا ہے۔
ریسکیوحکام کا کہنا تھا کہ ملبے سے شہدا کے جسد خاکی نکال کر اسپتال منتقل کئے جارہے ہیں، اگلے 2 گھنٹے میں ریسکیوآپریشن مکمل ہونے کی توقع ہے۔
ریسکیو آپریشن مکمل ہونے اور ملبہ ہٹانے کے بعد بی ڈی یو اور تفتیشی ٹیمیں مزید تحقیقات کرے گی۔
تحقیقاتی ٹیمیں جائے وقوعہ سے اہم شواہد اکٹھے کرنے میں مصروف ہیں، سی سی ٹی وی فوٹیج سمیت اہم شواہد کی مدد سے تفصیلی رپورٹ مرتب کی جائے۔
