پشاور : پولیس لائنز دھماکے میں جائے وقوعہ سے ملنے والے حملہ آور کے اعضا میچ کر گئے جبکہ حملہ آور کے جوتے اور ٹوپی بھی مل گئی ہے۔
تفصیلات کے مطابق پشاور پولیس لائن مسجد میں خودکش حملے کی تحقیقات جاری ہے۔
پولیس نے بتایا کہ خیبرمیڈیکل کالج میں حملہ آور کے اعضا کا ڈی این اے ٹیسٹ کیا گیا ، جائےوقوعہ سےملنے والے حملہ آور کے اعضا میچ کر گئے۔
پولیس کا کہنا تھا کہ حملہ آور کے جسمانی اعضا اور ہیلمٹ برآمد کر لیا جبکہ انویسٹی گیشن یونٹس کو حملہ آور کے جوتے اور ٹوپی بھی مل گئی ہے۔
اس سلسلے میں ایس ایس پی آپریشنز کاشف آفتاب عباسی نے میڈیا سے گفتگو کرتے ہوئے کہا تھا کہ دہشت گرد کے جوتے اور ہیلمٹ برآمد ہوئے، جو تحقیقاتی ٹیم کے حوالے کر دیے گئے ہیں۔
ایس ایس پی آپریشنز کا کہنا تھا کہ خود کش بمبار کا سر اور ملبے سے ٹانگوں کا ڈی این اے میچ ہو چکا ہے، واقعے کی تفتیش جاری ہے، ہم اس کا بدلہ لیں گے۔
اس سے قبل خیبر میڈیکل کالج نے بتایا تھا کہ پوسٹ مارٹم کیلئے 85 میتیں اور ڈی این اے کیلئے 6 اعضاموصول ہوئے، خود کش حملہ آور کے جسمانی اعضاموصول ہوئے تھے۔
خیبر میڈیکل کالج کا کہنا تھا کہ اعضاکا ڈین این اے 2 دن میں مکمل کیا گیا، لیب میں جدید ڈی این اے ٹیسٹنگ سسٹمز کی سہولت دستیاب ہے۔
