پشاور : پاکستان تحریک انصاف کے خاتون رہنما اور سابق ایم پی اے نادیہ شیر نے بھی دیگر متعدد رہنماؤں کی طرح پی ٹی آئی کو چھوڑنے کا فیصلہ کرلیا۔

پشاور میں پریس کانفرنس سے خطاب کرتے ہوئے خیبر پختونخوا کی سابق ایم پی اے نادیہ شیر نے کہا کہ پاکستان ہے تو ہم ہیں، میں پی ٹی آئی سے علیحدگی اختیار کررہی ہوں۔

نادیہ شیر کا کہنا تھا کہ ہمیں اپنے نوجوانوں کو یہ بتانا ہے کہ پاکستان سب سے پہلے ہے، انہوں نے بہت مختصر سی پریس کانفرنس میں چند باتیں کہیں اور صحافیوں کے کسی بھی سوال کا جواب دیئے بغیر چلی گئیں۔

یاد رہے کہ نو مئی 2023 کو سابق وزیراعظم عمران خان کی گرفتاری کے بعد ملک کے کئی شہروں میں پرتشدد مظاہرے اور احتجاج کیا گیا تھا، اس دوران فوج کی تنصیبات اور یادگاروں کو بھی نقصان پہنچایا گیا۔

ان واقعات کے بعد پی ٹی آئی کے کئی رہنماؤں اور ہزاروں کارکنان کو گرفتار کیا گیا جو آج مقدمات کا سامنا کر رہے ہیں، اور ساتھ ہی کئی اہم رہنما بھی پی ٹی آئی سے اپنے راستے جدا کررہے ہیں۔

ان حالات میں اس جماعت کو نہ صرف قانونی بلکہ سیاسی چیلنج کا بھی سامنا ہے کیونکہ پارٹی چھوڑنے والوں کی تعداد بڑھتی جارہی ہے۔