پی ایس ایل کے آٹھویں سیزن سے قبل پشاور زلمی کو چھوڑنے والے کامران اکمل لیگ کے کامیاب اور ریکارڈ ساز بلے باز رہے ہیں۔
کامران اکمل پی ایس ایل کے آغاز کے ساتھ ہی پشاور زلمی کے ساتھ رہے اور اب تک سات سیزن میں زلمی کی جانب سے 75 میچوں میں 1972 رنز بناکر وہ دوسرے کامیاب ترین بلے باز ہیں۔
کامران اکمل نے پی ایس ایل کے سات سیزن میں پشاور زلمی کے ساتھ رہتے ہوئے 6 سیزن میں سب سے زیادہ رنز بنانے والے بلے باز کا اعزاز پایا، اس کے ساتھ ہی وہ ایک ٹورنامنٹ کے کامیاب ترین بیٹر اور ایک بار کامیاب ترین وکٹ کیپر بھی قرار پائے۔
پی ایس ایل میں کامران اکمل نے تین سنچریاں اسکور کی ہیں اور یہ سنگ میل اب تک کوئی بیٹر عبور نہیں کرسکا ہے، انہیں تمام سیزن میں دوسرے سب سے زیادہ مین آف دی میچ ایوارڈ لینے کا اعزاز بھی حاصل ہے۔
سابق قومی بلے باز پی ایس ایل میں حریف بولرز کے سب سے زیادہ چھکے چھڑانے والے یعنی ان کی گیندوں پر سب سے زیادہ بار ہوا میں باؤنڈری پار پہنچانے اور چوکے مارنے کا اعزاز بھی رکھتے ہیں۔
@KamiAkmal23 PSL records https://t.co/nNE3ZvcLDp pic.twitter.com/v21rHCFm1f
— Fawwad Khan (@khanfawwad) November 1, 2022
واضح رہے کہ کامران اکمل نے پی ایس ایل میں اپنی پہلی ٹیم پشاور زلمی کو چھوڑنے کا اعلان سماجی رابطوں کی ویب سائٹ ٹوئٹر پر کیا ہے۔
کامران اکمل نے اپنے ٹوئٹ میں لکھا ہے کہ الوداع کہنا ہمیشہ مشکل ہوتا ہے، زلمی کے ساتھ گزارے سات سال بہترین رہے، اونچ نیچ اور مشکل وقت میں سپورٹ کرنے پر زلمی فیملی کا شکریہ۔
اس سے قبل گزشتہ روز اے آر وائی پر کرکٹ کے پرستاروں اور دیوانوں کے پسندیدہ شو ’’ ہر لمحہ پرجوش‘‘ میں بھی کامران اکمل کے پشاور زلمی کو چھوڑنے کا چرچا رہا۔
کامران اکمل نے بتایا کہ وہ پی ایس ایل کے اگلے سیزن میں کسی اور ٹیم کھلایا تو وہ اس ٹیم کی جانب سے سے کھیلیں گے۔
پروگرام میں شریک سابق قومی کپتان یونس خان نے کہا کہ رابطے ہونے چاہئیں، تنویر احمد نے کہا کہ کامران اکمل پی ایس ایل سیزن 8 میں اگر کسی اور ٹیم کی جانب سے کھیلنا چاہتے ہیں تو ضرور کھیلیں۔
